Tarazda bıyl 163 aýlany abattandyrýǵa qarjy bólingen
Oblys ortalyǵynda aýlalardy abattandyrýǵa «Jumyspen qamtýdyń jol kartasy-2020» baǵdarlamasy aıasynda qarajat bólingen.
Kóptegen aýlalar avtoturaq, átkenshekter men oryndyqtarmen jabdyqtalyp, aıtarlyqtaı ózgergeni atqarylyp jatqan jumystardyń jemisi ekendigi daýsyz.
Degenmen, keıbir merdigerlerdiń belgilengen merzimnen aýytqyp, bastalǵan isterin jarty jolda qaldyrýy turǵyndardyń shaǵymdaryn týǵyzýda.
Jambyl oblysynyń ákimi Berdibek Saparbaev Taraz qalasyn aralaý barysynda problemalyq nysandardy aralap, qalalyqtardyń shaǵymdaryna qulaq asty. Talas, Jaılaý, Samal shaǵynaýdandaryndaǵy jaǵdaı uqsas.
Qurylysshylar aýlalardaǵy asfalttaý jumystaryn tolyqtaı aıaqtamaǵan, oıyn alańdaryndaǵy átkenshekter jáne basqa konstrýktsııalar durys ornatylmaǵan.
«Qala turǵyndarynyń jaılylyǵy men qaýipsizdigin qamtamasyz etý maqsatynda sońǵy birneshe aıda úlken jumys atqaryldy. Biraq keıbir kompanııalar óz kúshterin baǵamdaı almaı, sonyń saldarynan qazir turǵyndarǵa qolaısyzdyqtar týǵyzýda. Sizderde barlyq jaǵdaı jasalyndy, qajetti qarajat bólindi. Tek bir aýla úshin 11 mıllıon teńge qarastyrylǵan. Jumystyń keshigýi negizsiz. Biz mundaı jumysty qabyldamaımyz. Bastalǵan jumys ýaqytyly aıaqtalýy tıis. Osy aptada barlyq kemshilikterdi túzetý qajet. Asfaltty muqııat jaýyp, balalar alańyn rettep, oryndyqtar men átkenshekterdi jóndeńizder», - dedi Berdibek Saparbaev merdigerlerge.
Muny Taraz qalasynyń ákimi Aıtqazy Qarabalaev qadaǵalaýy tıis. Sondaı-aq, aımaq basshysy sý aryqtaryn jóndeýdi jáne aýlalardy qoqystan tazartýdy tapsyrdy. Ol bir aptadan soń bul nysandarǵa taǵy da keletin eskertti.
Jaılaý yqshamaýdanynyń turǵyny Qundyzaı Ásemqulova da kólikterin yńǵaısyz qoıa salatyn nemquraıly júrgizýshilerge qatysty shaǵymyn jetkizdi.
Oblys ákimi bul máseleni sheshý úshin ýchaskelik ınspektordyń aınalysatynyn aıtty.
Berdibek Saparbaev Talas shaǵynaýdanyndaǵy kommýnaldyq dúkenge arnaıy bas suqty. Turǵyndar mundaǵy baǵalardyń naryqtaǵydan tómen ekenin, biraq barlyq ónim ýaqytynda jetkizilmeıtinin atap ótti.
«ÁKK-Taraz» UK» AQ basshylyǵyna bul máseleni baqylaýǵa alý tapsyryldy.
