Tarazda birneshe páterdi tonaǵan ury ustaldy
TARAZ. QazAqparat – Jambyldyq polıtseıler birqatar páter urlyǵyna qatysy bar kúdiktini ustady, dep habarlaıdy QazAqparat.
Oblystyq polıtsııa departamenti baspasóz qyzmetiniń málimdeýinshe 2 shildende Taraz turǵyny páteri tonalǵany jóninde shaǵymdanǵan. Onda quny 150 myń teńge noýtbýk jáne bank kartasy urlanǵandyǵy habarlanǵan.
«Polıtsııa 31 jastaǵy qala turǵynyn ustady. Kúdiktiniń turǵylyqty jeri boıynsha júrgizilgen tintý kezinde eski monetalar, uıaly telefondar, baǵaly zattar, qymbat saǵattar, patrondar jáne qarý sekildi 100-den astam túrli zat anyqtaldy. Kúdiktiniń páterinde tabylǵan árbir zattyń qylmysqa qatystylyǵy tekseriledi», - delingen vedomstvo málimdemesinde.
Kúdikti Taraz qalasynyń ýaqytsha ustaý abaqtysyna qamaqqa alynyp, QR QK 188-babynyń 2-bóliginiń 3-tarmaǵy boıynsha sotqa deıingi tergeý júrgizilýde.
Polıtsııa departamenti óziniń nemese tanystarynyń zattaryn bilgen jaǵdaıda, Taraz qalasy polıtsııa basqarmasynyń birinshi polıtsııa bólimine 8(7262)99-78-07, 87751326800 nómirleri boıynsha nemese 102 pýltine habarlasýdy surap, páterden tárkilengen zattardyń sýretterin jarııalady.
