Tarazda bıiktigi 30 metrlik «Qazaq eline myń alǵys» stellasy boı kóterýde

TARAZ. QazAqparat –Taraz qalasynda «Qazaq eline myń alǵys» stellasy boı kóteredi, - dep habarlaıdy QazAqparat Jambyl oblysy ákiminiń baspasóz qyzmetine silteme jasap.

Aımaq basshysy Berdibek Saparbaev oblys ortalyǵyn aralaý barysynda «Qazaq eline myń alǵys» stellasynyń qurylys jumystarymen de tanysty. Bıiktigi 30 metr bolatyn sáýlet qurylysy - «Arbattyń» ekinshi kezeńiniń bir bóligi sanalady.

Stella ornalasatyn jalpy aýdany 3,5 ga bolatyn aýmaqta kópjyldyq jáne sándik aǵashtar, kógal otyrǵyzylyp, sýburqaq ornatý, jaryqtandyrý, oryndyqtar jáne shaǵyn sáýlet nysandarynyń qurylysy boıynsha birqatar jumystar atqarylmaq.

– Tıisti jumystardyń barlyǵy sapaly júrgizilýi tıis. Qala ákimi qurylys barysyn únemi nazarda ustap, baqylap otyrýy qajet. Biz Tarazda qala turǵyndary men qonaqtaryna arnap, demalatyn jasyl aımaq qurýǵa aıryqsha kúsh jumsaýymyz kerek, – dedi oblys ákimi Berdibek Saparbaev.

Sondaı-aq, aımaq basshysy qala ákimine birqatar kommertsııalyq nysandardyń syrtqy kelbetin retke keltirý, mańyndaǵy aýmaqtardy jaılastyrý máseleleri boıynsha olardyń ıelerimen túsindirý jumysyn júrgizýdi tapsyrdy.