Tarazda bıiktigi 13 metr bolatyn Áýlıeata eskertkishi ashylady

TARAZ. QazAqparat – Tarazda qala kúnine oraı Áýlıeata eskertkishin ashý josparlanyp otyr, dep habarlaıdy QazAqparat tilshisi.

Qazirgi tańda eskertkishtiń tuǵyrtasy qalanýda. Qurlys basynda 80 jumysshy, 8 tehnıka jumys istep jatyr. Qala ákimdiginiń málimetine súıensek, tuǵyrtastyń bıiktigi - 8 metr, eskertkishtiń bıiktigi - 13 metr bolmaq.

Eskertkish bıik qyrdyń basynda ornalasqan. Qyrdyń etegindegi kire berisinde arka, arnaıy tamashalaý alańy, eskertkishke kóteriletin baspaldaq ornalasqan. Janynda Talas ózeni aǵyp jatyr. Ózenniń ústindegi kópirdiń eki jaǵynda bıiktigi 4 metr bolatyn eki arystannyń músini, baspaldaq boıymen Qarluq qaǵanaty kezinen arab ekspansııasyna deıingi qalalar beınelenetin ınstalıatsııa ornatylmaq.

Aıta keteıik, eskertkish «Tekturmas» jobasynyń birinshi kezeńi boıynsha boı kóterýde. Jobanyń ekinshi kezeńinde eskertkishtiń sol jaq bóligindegi alańda Atlah shaıqasy men Ańyraqaı shaıqasyn beıneleıtin qabyrǵa ornatylady. Sondaı-aq, eskertkishtiń aınalasyna basqa da jobalar josparlanǵan.