Tarazda besinshi balasyn dúnıege ákelgen kópbalaly ana kóz jumdy
ASTANA. KAZINFORM — Tarazda besinshi sábıin bosanǵannan keıin qaıtys bolǵan áıeldiń ólimine qatysty mán-jaı anyqtalyp jatyr. Bul aqparatty Jambyl oblystyq densaýlyq saqtaý basqarmasy rastady.
Vedomstvonyń málimetinshe, áıel júktilik kezinde T. Rysqulov aýdandyq ortalyq aýrýhanasynda esepte turǵan. 9 maýsym kúni ol josparly túrde bosandyrý úshin Jambyl oblystyq perınataldyq ortalyqqa jatqyzylǵan.
Medıtsınalyq kórsetilimderge baılanysty dárigerler operatsııa arqyly bosandyrý týraly sheshim qabyldaǵan. 12 maýsymda áıel ómirge deni saý ul balany ákeldi.
Dárigerlerdiń aıtýynsha, bosanǵannan keıingi kezeńde naýqastyń jaǵdaıy kúrt nasharlaǵan. Ony emdeýge oblystyq jáne respýblıkalyq deńgeıdegi mamandar jumyldyrylyp, barlyq qajetti dıagnostıkalyq tekserýler, hırýrgııalyq operatsııalar men reanımatsııalyq sharalar júrgizilgen. Soǵan qaramastan, dárigerler áıeldiń ómirin saqtap qala almady.
Marqumnyń týystarynyń aıtýynsha, kesir tiliginen keıin áıeldiń dene qyzýy kóterilip, jaǵdaıy kún ótken saıyn nasharlaı bastaǵan. Olardyń sózinshe, keıingi kúnderi naýqas birneshe medıtsınalyq mekeme arasynda aýystyrylyp, emdeý barysynda birneshe operatsııany bastan ótkergen jáne jasandy tynys aldyrý apparatyna qosylǵan.
Sondaı-aq týystary dárigerlerdiń olarǵa operatsııadan keıingi aýyr asqynýlar, onyń ishinde qabyný úderisi, sepsıs jáne kóp aǵzalyq jetkiliksizdik damyǵanyn aıtqanyn jetkizdi. Alaıda bul aqparat ázirge resmı túrde rastalǵan joq.
Oqıǵanyń naqty sebepterin mamandar anyqtaıdy. Bul iske Medıtsınalyq jáne farmatsevtıkalyq baqylaý komıteti tekserý júrgizedi. Sonymen qatar Jambyl oblystyq densaýlyq saqtaý basqarmasy qyzmettik tekserý júrgizý úshin arnaıy jumys tobyn qurdy.
— Ólimniń naqty sebebi sot-medıtsınalyq saraptamanyń qorytyndysy shyqqannan keıin anyqtalady, — dep habarlady vedomstvo.
Densaýlyq saqtaý basqarmasy emdeý barysyna qatysty ózge málimetterdi jarııalaýdan bas tartty. Vedomstvo muny «Halyq densaýlyǵy jáne densaýlyq saqtaý júıesi týraly» kodeksiniń 273-babymen túsindirdi. Atalǵan normaǵa sáıkes, naýqastyń dıagnozy, densaýlyq jaǵdaıy jáne oǵan kórsetilgen medıtsınalyq kómek týraly málimetter dárigerlik qupııa bolyp qalady.
Aıta keteıik, Aqtóbedegi daýyl kezinde zardap shekken júkti áıel jansaqtaý bóliminde jatyr.
