Tarazdyq belsendiler polıtsııaǵa pedofıldi ustap berdi
ASTANA. KAZINFORM — Ustalǵan er adam alǵashqyda ózine taǵylǵan aıyptardy joqqa shyǵarǵanymen, keıin 12 jasar qyzǵa shynymen hat jazǵanyn moıyndady.
«Jańa adamdar» qozǵalysynyń «124» azamattyq naýqany eki jyldan astam ýaqyt boıy jalǵasyp keledi. Onyń jumysy balalardy jynystyq zorlyq-zombylyqtan qorǵaýǵa baǵyttalǵan. Olar áleýmettik jelide qaýipti bolýy múmkin adamdardy anyqtap, sodan keıin barlyq málimetti polıtsııaǵa habarlaıdy. Jaqynda Tarazda pedofılge kúdikti taǵy bir azamat qolǵa tústi.
Belsendiler 12 jasar qyzdyń atynan akkaýnt ashyp, oǵan er adam nazar aýdarǵan. Ol akkaýnt ıesine ońaı 50 000 teńge tabýdyń jolyn usynady. Oǵan kámeletke tolmaǵan qyzdyń pornografııalyq vıdeosyn jiberip, ondaǵy qyzdyń 13 jasta ekenin kórsetip, beınejazbadaǵy kórinisterdi qaıtalaýdy usynǵan.
Ol áńgime barysynda ashyq-shashyq fotolar men vıdeolar jiberýdi jáne jeke kezdesýdi talap etken. Kúdikti aqsha usynǵannan keıin kosmetıka, tátti jáne qyz qalaǵan kez kelgen nárseni alyp berýge ýáde etip, kezdesýdiń jolyn tabýǵa tyrysqan. Qyz óziniń nebári 12 jasta ekenin aıtqanymen, er adam bul qalypty jaǵdaı dep jaýap bergen.
Jasóspirimniń mekenjaıyn alǵan er adam birden onyń esiginiń aldyna barady. Onda belsendiler men polıtsııa qyzmetkerleri kútip turdy. Ustalǵan er adam alǵashqyda birazǵa deıin jaltarǵan. Ol telefonynda habarlamalar joq ekenin kórsetip, tipti tártip saqshylaryna polıtsııa qyzmetkeri ekenin aıtyp, jaǵdaıdy turaqtandyrýǵa árekettengen.
Qazir er adam qamaýǵa alyndy.
Jambyl oblystyq polıtsııa departamenti bul oqıǵa boıynsha sotqa deıingi tergeý bastalǵanyn jáne qazirgi ýaqytta oqıǵanyń barlyq mán-jaıyn anyqtaý úshin qajetti tergeý sharalary júrgizilip jatqanyn rastady. Alaıda er adamǵa qandaı aıyp taǵylǵany aıtylmaǵan. Sondaı-aq kúdiktiniń polıtsııa qyzmetkeri ekenine qatysty pikir bildirgen joq.
Buǵan deıin pedofılderge hımııalyq kastratsııa túrmeden shyǵýyna alty aı qalǵanda júrgiziletinin jazǵan bolatynbyz.
Eske salaıyq, Jetisý, Jambyl jáne Batys Qazaqstan oblysyndaǵy pedofılder ómir boıyna bas bostandyǵynan aıyryldy.