Tarazda belgisiz adam sý qoımasynyń shlıýzin ashyp, ondaǵan úıdi sý basty
ASTANA. KAZINFORM — Taraz qalasynda belgisiz adamnyń ruqsatsyz «Zerbulak» kóline tıesili shlıýzdi ashýy saldarynan sýarmaly kanaldarǵa shamadan tys sý ketken. Sonyń saldarynan birneshe kóshe sý astynda qaldy, dep habarlaıdy Kazinform tilshisi.
Oqıǵa 7 tamyz kúni keshki saǵat 20:35 shamasynda bolǵan. Belgisiz bireý sýarý kanalyna shlıýzdi ashyp jibergen. Sonyń saldarynan Dostoevskıı, Jýanyshev, Ulbıke aqyn kóshelerindegi aýlalar men Nıetqalıev jáne Bóltirik sheshen kóshelerindegi keıbir úılerdi sý basqan.
— Kórshilerimizdiń úıinde sý 30 santımetrge deıin kóterildi. Bizdiń de úı men monshamyzǵa sý kirip ketti, — deıdi zeınetker Svetlana Gerıng.
Ákimdiktiń málimetinshe, barlyǵy 30 turǵyn úıdiń aýlasyn jáne 2 jertóle bólmesin sý basqan. Degenmen úılerdiń ishki bólmelerine sý kirmegen.
Tótenshe jaǵdaı jedel túrde baqylaýǵa alyndy. Aldymen shlıýzder jabylyp, sý aǵyny toqtatyldy. Keıin Jambyl oblysy Tótenshe jaǵdaılar departamentiniń qutqarýshylary men «Jambyl-Sý» mekemesiniń qyzmetkerleri sý tartý jumystaryna kiristi. Barlyǵy 25 maman jumyldyryldy jáne 12 tehnıka, onyń ishinde 5 motopompa qoldanyldy.
Buǵan deıin Tarazda óndiristik tseh órtengeni habarlandy.