Tarazda bazardaǵy órtten zardap shekken kásipkerlerge kómek kórsetiledi
Qala ákimdiginiń baspasóz qyzmetiniń málimetinshe, barlyǵy 90 kásipker shyǵynǵa batqan. Taraz qalasynyń ákimi Baqytjan Orynbekov, qala prokýrory Jambyl Smatov, Taraz qalalyq tótenshe jaǵdaılar basqarmasynyń basshysy Ásker Sarbatov, qalalyq ishki ister basqarmasynyń basshysy Ardaq Mádimarov zardap shekken kásipkerlermen áńgimelesti.
Qala basshysy órt qaýipsizdigi boıynsha buryn atqarylǵan sharalardy eske saldy.
«2022 jyldyń 15 jeltoqsanynda saýda kásiporyndary basshylarynyń qatysýymen órt qaýipsizdigi sharalary boıynsha arnaıy keńes ótti», - dedi Baqytjan Orynbekov.
Jıyn barysynda qalalyq tótenshe jaǵdaılar basqarmasynyń basshysy Ásker Sarbatov saýda nysandaryndaǵy kemshilikterdi joıý boıynsha naqty usynystaryn aıtty. Osy usynystar negizinde hattama jasalyp, tıisti memlekettik organdardyń basshylaryna jáne kásipkerlik sýbektilerine joldanady. Jıynǵa «Aqsaı» saýda ortalyǵynyń qaýipsizdik máseleleri jónindegi jaýapty ókili de keldi.
«Ókinishke oraı, búgin oqys oqıǵa boldy. Oblys ákiminiń tapsyrmasyna sáıkes, árbir zardap shegýshi óz qyzmetin jalǵastyrý úshin qalanyń basqa da saýda oryndarynan ýaqytsha orynmen qamtamasyz etiledi. Osy naryqtaǵy kásipkerlerdiń bıznes úshin alǵan nesıelerin ustap qalý jáne tóleýdi ýaqytsha toqtatý týraly banktermen kelissózder júrgiziletin bolady. Tergeý protsesi tolyq aıaqtalǵansha bazar ázirge jumys istemeıdi. Saraptama qorytyndysy boıynsha kásipkerlerge keltirilgen shyǵyn kólemi tolyq esepteledi», - degen qala basshysy jaǵdaıdyń jeke baqylaýynda ekenin atap ótti.
«Otyrys sońynda ákimdik qyzmetkerleri men kásipkerlerdiń arasynan basqa da kásipkerlerdi jedel-izdestirý sharalarynyń barysy men talap etiletin is-áreketter týraly jedel habardar etetin bastamashyl top quryldy», - dep naqtylady vedomstvo.
Habarlanǵandaı, Tarazda juma kúni «Aqsaı» bazaryndaǵy jeke eki qabatty kommertsııalyq ǵımarattyń shatyry órtendi. Kórsetilgen órt aýmaǵy 1050 sharshy metrdi quraıdy. Órt saldarynan 25 jastaǵy azamattyq qorǵaý serjanty, sondaı-aq dárigerler júıke aýrýy degen dıagnoz qoıǵan 39 jáne 55 jastaǵy eki áıel zardap shekti.
Saýda ortalyǵy ǵımaraty men 44 dúńgirshektiń shatyryn sharpyǵan órtti sóndirýge jambyldyq qutqarýshylar bir saǵattan astam ýaqyt jumsady. Tótenshe jaǵdaılar departamentiniń 64 qyzmetkeri men 17 tehnıka jumyldyrylǵan.
Foto Taraz qalasy ákimdiginiń baspasóz qyzmeti