Tarazda basy daýǵa qalǵan mektep dırektory qyzmetinen shettetildi
TARAZ. QazAqparat – Tarazda basy daýǵa qalǵan №43 mektep dırektory qyzmetinen ýaqytsha shettetildi. Al, mektep dırektorynyń zańsyz árketteri týraly aıtyp, jumystan «negizsiz qýyldym» dep beıneúndeý joldaǵan muǵalim qyzmetine qaıta oraldy, dep habarlaıdy QazAqparat.
Bul týraly oblys ákiminiń baspasóz qyzmeti habarlady. Onda aǵymdaǵy jyldyń 24 aqpanynda Taraz qalalyq bilim bólimine qarasty № 43 orta mektep muǵaliminiń ótinishine baılanysty oblys ákiminiń tapsyrmasymen jumys komıssııasy qurylǵandyǵy aıtylǵan. Komıssııa quramyna bilim basqarmasynyń, salalyq kásipodaq, úkimettik emes uıym ókilderi enipti.
«Jarııalanǵan beınerolıkte aıtylǵan barlyq faktiler boıynsha tekserý sharalary júrgizilýde. Onda keltirilgen faktiler rastalǵan jaǵdaıda materıaldar quqyq qorǵaý organdaryna jiberiledi. Taraz qalasy ákimdiginiń bilim bóliminiń jeke eńbek daýlaryn sheshý jónindegi kelisý komıssııasynyń sheshimimen K.Bórimbekova №43 orta mektebiniń qazaq tili pániniń muǵalimi qyzmetine qaıta qabyldandy. Al, Taraz qalasyndaǵy № 43 mektep dırektory E.Ómirbekova ýaqytsha qyzmetinen bosatyldy» delingen baspasóz qyzmetiniń habarlamasynda.
Qazirgi kezde bul másele oblystyq bilim berý salasynda sapany qamtamasyz etý departamentiniń, oblystyq bilim basqarmasynyń, Taraz qalasy ákimdiginiń jáne «Nur Otan» partııasy ókilderiniń qatysýmen atalǵan másele jan-jaqty zerdelenýde. Tekserý is-sharalary tolyq aıaqtalǵannan keıin qoldanystaǵy zańnama talaptaryna sáıkes naqty sheshim qabyldanbaq. Búgingi tańda mektep qalypty rejımde jumys istep, tıisinshe oqýshylar sabaqqa qatysýda. Barlyq sabaqtar kestege sáıkes ótýde.
Aıta keteıik, buǵan deıin atalǵan mekteptiń muǵalimi Kúnsulý Bórimbekova jumystan «negizsiz qýyldym» dep, óziniń janaıqaıyn beıneúndeý arqyly jetkizgen bolatyn. Áleýmettik jelide taralǵan beıneúndeýde ustaz El Prezıdenti men bilim mınıstrinen arasha suraǵan edi. Onda ol mektep dırektory Elmıra Ómirbekova atalǵan oqý ordasyna basshy bolyp kelgeli ujymnyń berekesi qashqanyn, kóptegen muǵalimderdi jumystan qýyp, 20-25 jyldyq eńbek ótili bar pedagogterdi óz erkimen qyzmetinen ketýge májbúrlegenin ashyna jetkizgen.
