Tarazda bankke «bomba qoıǵan» kúdikti ustaldy
TARAZ. QazAqparat - Jambyl oblystyq tótenshe jaǵdaılar departamentiniń 112 jelisine er adam qońyraý shalyp, «Sberbank» AQ Jambyl fılıalynyń ǵımaratyna jarylǵysh zat qoıylǵanyn aıtqan, dep habarlaıdy QazAqparat.
Habarlama alǵannan keıin bank aýmaǵyn patrýl polıtsııasynyń «Boran-22» jáne «Boran-24» ekıpaj jasaqtary qorshap, qarjy-nesıe mekemesiniń 47 qyzmetkeri qaýipsiz jerge kóshirilgen. Bul týraly oblystyq polıtsııa departamentiniń baspasóz qyzmeti málimdedi.
«Bank mekemesine shuǵyl túrde qyzmettik ıtter men jarǵysh-tehnıkter, polıtsııa departamentiniń basshylyǵy men túrli basqarmalar qyzmetkerleri, UQKD, TJD jáne jedel medıtsınalyq kómek brıgadalary keldi. Tekserý barysynda jarylǵysh qurylǵy tabylǵan joq»,-delingen vedomstvo málimdemesinde.
Aıta ketý kerek, jalǵan habarlama deregi boıynsha birden ekstremızmge qarsy is-qımyl basqarmasynyń qyzmetkerleri jedel-izdestirý is-sharalaryn júrgizgen. Nátıjesinde Jambyl aýdanynyń 32 jastaǵy turǵyny anyqtalyp, ustaldy. Ol óz kinásin tolyq moıyndady.
«Qazirgi ýaqytta Qylmystyq kodekstiń 273-babymen (terrorızm aktisi týraly kórineý jalǵan habarlaý) sotqa deıingi tergeý amaldary júrgizilýde. Kúdikti Taraz qalasy polıtsııa basqarmasynyń ýaqytsha ustaý ızolıatoryna qamaldy»,-deıdi oblystyq polıtsııa departamenti baspasóz qyzmetiniń jetekshisi Gúlsara Muhtarqulova.
