Tarazda Balalar ýnıversıteti ashyldy
ASTANA. QazAqparat - Taraz memlekettik pedagogıkalyq ınstıtýtynda Balalar ýnıversıteti ashyldy. «Kids University» jobasy mektep oqýshylarynyń shyǵarmashylyq qabiletin damytýdy, zamanaýı tehnologııalardy meńgertýdi jáne ony ómirde qoldana bilýge daǵdylandyrýdy kózdeıdi. Bul jaıynda TarMPI-dyń Aqparattyq-ımıdjdik qyzmetiniń jetekshisi Jandar Asan málim etti, dep habarlaıdy QazAqparat.
Oqý ornynyń 50 jyldyǵy qarsańynda uıymdastyrylǵan shara 8 baǵyt boıynsha júrgiziledi. Alǵashqy kezeń boıynsha ınstıtýt ǵalymdary Jambyl oblysy men Taraz qalasyndaǵy mektep oqýshylaryn hımııa, bıologııa, fızıka jáne robototehnıka salalary boıynsha júrgizilgen zertteý jumystarynyń qyr-syrymen tanystyryp, ınnovatsııalyq oılaryn ortaǵa saldy.
Keshendi tájirıbe júrgizýge pedagogıkalyq ınstıtýttyń bazasynda tolyq jaǵdaı jasalǵan. Oqý ornynda stýdentter men mektep oqýshylarynyń robototehnıka boıynsha ǵylymı-tehnıkalyq shyǵarmashylyq qabiletin damytý maqsatynda «Elektrotehnıka», «Radıotehnıka», «Elektronıka negizderi» jáne «Mekteptegi robototehnıka» oqý-zerthanalary jumys isteıdi. Dárishanalar Lego, Tetrix, Arduino robottarymen, zamanaýı qurylǵylarmen, oqý-ádistemelik jáne baǵdarlamalyq nusqaýlyqtarmen jabdyqtalǵan. Sonymen qatar, fızıka-matematıka fakýltetiniń Jambyl oblysyndaǵy orta jáne arnaıy mektepterindegi ınformatıka páni muǵalimderiniń robototehnıka, elektronıka negizderi men radıotehnıka pánderi boıynsha biliktiligin kóterýge arnalǵan materıaldyq jáne resýrstyq bazalary bar.
Instıtýtta tájirıbeden ótken ozyq oıly oqýshylardyń ǵylymı jobalary ortalyqta toptastyrylady. Eńbekterdi óndiriske engizý isi de jan-jaqty qarastyrylmaq.
Al, jobanyń óner, mádenıet jáne sport baǵyty boıynsha TarMPI ustazdary jetkinshekterge «Dızaın», «Beıneleý óneri», «Sporttyq jattyǵýlar», «Sýret jáne syzý», «Horeografııa», «Alǵashqy áskerı daıyndyq» jáne «Mýzykalyq aspaptardy úırený» sektsııalary boıynsha sheberlik synyptaryn ótkizip, atalǵan mamandyqtardyń qyr-syrymen tanystyrdy.
«Búgingi tájirıbelik sabaqtardy esimi elge belgili óner maıtalmandary, qylqalam sheberleri men álemdik sport básekelerinde «júzden júırik, myńnan tulpar» shyqqan sport sheberleri ótkizdi. Bul sharanyń mektep oqýshylarynyń mamandyq tańdaýda tıgizetin yqpaly zor. Jastardyń óz beıimine qaraı dál sol salada tereń bilim alýy elimizdegi maman tapshylyǵy men jumyssyzdyq máselesiniń oń sheshim tabýyna sep bolmaq», deıdi joba avtorlary.
