Tarazda balabaqsha kezegin 92% qysqartqan tásildi barlyq óńirge engizý usynyldy

ASTANA. KAZINFORM – Elimizde jańa týǵan sábılerge JSN avtomatty túrde beriledi, balabaqsha kezegi qysqaryp, mektepke qabyldaýdaǵy qaǵazbastylyq joıyldy. Tipti stýdentterge jataqhana ótinishsiz, proaktıvti túrde beriletin boldy.

Memlekettik qyzmetterdi jetildirý týraly tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtyp berdi.

Mınıstr árbir ómirlik jaǵdaıǵa proaktıvti tsıfrlyq sheshimder usynylatynyn atap ótti.

− Mysaly, bala dúnıege kelgende azamattar endi qujat rásimdeýge, eńbekke jaramsyzdyq paraǵyn alýǵa nemese járdemaqy rásimdeýge ýaqyt jumsamaıdy. Barlyǵy avtomatty túrde smartfon arqyly sheshiledi. Astana qalasy men Aqmola oblysynda jańa týǵan nárestelerge jeke sáıkestendirý nómiri avtomatty túrde taǵaıyndaý synaqtan ótti, − dedi mınıstr Úkimettiń búgingi otyrysynda.

Sondaı-aq ótken jyly Taraz qalasynda balabaqshaǵa qabyldaý kezinde vaýcherlik qarjylandyrý tetigi synaqtan ótkizildi. Nátıjesinde kezek 92%-ǵa qysqarǵan. Mınıstr bul tásilderdi búkil óńirlerge masshtabtaýdy usyndy.

− Oqý-aǵartý mınıstrligimen birlesip, mektepke qabyldaýdaǵy qaǵazbastylyqty tolyq joıdyq. Qosymsha «Áleýmettik ámııan» engizildi — bul tegin tamaqtandyrýdy baqylaýǵa, jalǵan málimetterdi boldyrmaýǵa jáne bıýdjet qarajatyn tıimdi paıdalanýǵa múmkindik beredi. Bul joba eldiń barlyq mektepterine engizilip jatyr. Sondaı-aq kolledjder men joǵary oqý oryndaryna túsý protsesi tsıfrlandyryldy. Basqa qaladan kelgen stýdentterge jataqhana ótinishsiz, avtomatty túrde beriledi, − dep túsindirdi J. Mádıev.

Sonymen birge, elimizde Tsıfrlyq eńbek shartyn jasaý servısi iske qosyldy. Eńbek jáne halyqty áleýmettik qorǵaý mınıstrligimen birlesip, zeınetaqy tólemderin proaktıvti túrde taǵaıyndaıtyn uıymdar tizimi keńeıilýde.

Aıta keteıik, ótken jyly Qazaqstanda memlekettik qyzmettiń 91% onlaın kórsetilgen. «Ulttyq qor – balalarǵa», «Stop-kredıt», «Kólik ıelený tarıhy», «Qumar oıyndarǵa qatysýdan erikti túrde bas tartý» sekildi tanymal servıster iske qosylǵan.

Buǵan deıin J. Mádıev eGov arqyly kedergi keltirgen kólik ıelerine anonımdi habarlama jiberýge bolatynyn aıtqan edi.