Tarazda az qamtylǵan otbasylardyń balalaryn mektepke daıyndaýǵa 400 mln teńge bólindi

TARAZ. QazAqparat - Aımaqta jyl saıynǵy «Mektepke jol» qaıyrymdylyq aktsııasynyń qorytyndysy shyǵaryldy, dep habarlaıdy «QazAqparat» HAA tilshisi Jambyl oblysy ákiminiń baspasóz qyzmetine silteme jasap.

Taraz qalasy ákimdigi bilim basqarmasynyń basshysy Múbárak Jánibekovanyń málimetinshe, áleýmettik jaǵynan az qamtylǵan otbasylardyń balalaryn mektepke daıyndaýǵa 400 mln teńge qarastyrylǵan.

«Tarazda júzden astam bilim berý mekemeleri bar, olardyń 59-y - jalpy bilim beretin mektepter. Jańa oqý jylynda biz 67 myń oqýshyny qabyldamaqshymyz, bul byltyrǵy jylmen salystyrǵanda úsh myńǵa artyq. Onyń ústine áleýmettik jaǵynan az qamtylǵan jáne kópbalaly otbasylary balalarynyń sany on myńnan asady. Olardyń tek mektep formalarynyń ózine 98 mln. teńge bólingen. Bul balalarǵa sonymen qatar, qystyq kıimder de alynady. 9 myń 832 balanyń tegin tamaqtanýyna 289 mln teńge bólindi», - dedi bilim basqarmasynyń basshysy.

Oblystyq bilim basqarmasynyń málimetine súıensek, ekinshi qyrkúıek kúni aımaqtaǵy 451 mektepke 214 myńnan astam oqýshy keledi (2016 jyly - 207,4 myń), olardyń 26,2 myńy - mektep tabaldyryǵyn endi ǵana attaıtyndar.