Tarazda avtokólik bólshekterin urlaǵan kúdikti beınekameraǵa túsip qalǵan
TARAZ. QazAqparat – Taraz qalasynyń turǵyny quny jarty mıllıon teńgeden asatyn avtokólik bólshekterin urlady degen kúdikke ilindi, dep habarlaıdy QazAqparat tilshisi.
30 qarasha kúni polıtsııaǵa 69 jastaǵy áıel úıine jaqyn jerde turǵan kóliginen dóńgelekter men avtokólik bólshekteriniń urlaǵany týraly shaǵym túsirgen.
«Atalǵan fakt boıynsha 188-baptyń 1-bóligi (Urlyq) boıynsha sotqa deıingi tergeý bastaldy. Jedel-izdestirý is-sharalarynyń nátıjesinde polıtsııa qyzmetkerleri Taraz qalasynyń 24 jastaǵy turǵynyn anyqtap, qolǵa túsirdi. Kúdikti beınekameraǵa túsip qalǵan. Ol, sonymen qatar, buǵan deıin turǵyn úı garajynan gaz quraly, avtokólik dóńgelekteri men kiltter jıyntyǵyn urlady degen kúdikke alynǵan»,-delingen oblystyq polıtsııa departamentiniń baspasóz qyzmetiniń habarlamasynda.
Kúdikti eki faktini de moıyndaǵan. Qazirgi tańda tergeý amaldary júrgizilýde.
Jambyl oblysynyń polıtsııa basqarmasy avtokólikten múlikti urlaý qaýpin azaıtý boıynsha ony dabyl berý quralymen jabdyqtaý, túngi ýaqytta kólikterdi úılerdiń aýlalarynda nemese ońasha buryshtarda qaraýsyz qaldyrmaý kerektigin eskertedi.
