Tarazda avtobýs pen jedel járdem kóligi soqtyǵysyp, tórt adam zardap shekti
TARAZ. QazAqparat - Búgin Taraz qalasynda birneshe adam zardap shekken jol kólik oqıǵasy boldy, dep habarlaıdy «QazAqparat» HAA tilshisi.
«3 mamyr kúni Taraz qalasynda «Gazel-32214» markaly jedel járdem kóligi men «DONG FENG» markaly jolaýshylar avtobýsynyń qaqtyǵysýy saldarynan jol kólik oqıǵasy boldy», - dep habarlady Jambyl oblysy polıtsııa departamentiniń baspasóz qyzmeti. - Oqıǵa saldarynan jedel járdem kóligi bir jaǵyna aýdarylǵan. Avtobýs jolaýshylarynyń bireýi jáne jedel járdem kóliginde bolǵan úsh adam jaraqat aldy. Atalǵan derek boıynsha tıisti saraptamalar taǵaıyndaldy».
Belgili bolǵandaı, zardap shekkenderdiń barlyǵy oblys ortalyǵyndaǵy emdeý uıymdarynyń medıtsınalyq kómegine júginip, qajetti kómekterin alǵannan keıin úılerine qaıtaryldy.
Oblys ákimdiginiń jolaýshylar tasymaly jáne avtomobıl joldary basqarmasy málimetinshe, bıylǵy jyldyń úsh aıynda oblys boıynsha 265 jol kólik oqıǵasy tirkelip, saldarynan 20 adam qaza taýyp, 431 adam zardap shekken.
«Jasalǵan saraptama jol kólik oqıǵalarynyń basym bóligi jol júrý erejeleriniń saqtalmaýynan, ásirese jyldamdyqty arttyrý saldarynan bolatynyn anyqtap otyr, - dedi Jambyl oblysy polıtsııa departamenti baspasóz qyzmetiniń basshysy Gúlsara Muhtarqulova. - Bizdegi júrgizýshilerde jol júrý mádenıetiniń joqtyǵy men jol júrý erejelerin saqtamaýy osyndaı qaıǵyly oqıǵalarǵa jıi ákep soqtyrady. Keıingi kezde júrgizýshilerdiń jedel járdem kólikterine jol bermeýi ózekti máselege aınaldy».
Avtor: Galına Skrıpnık
