Tarazda Áýlıeata yqshamaýdany Balaýsa dep ózgertildi

TARAZ. KAZINFORM – Tarazda Áýlıeata yqshamaýdany qalanyń osy attas jańa ákimshilik aýdanynyń quramyna engendikten, ataýy Balaýsa bolyp ózgertildi.

Esterińizge sala keteıik, jýyrda Taraz eki ákimshilik aýdanǵa bólingen bolatyn – «Áýlıeata» jáne «Jibek joly». Sol kezde jańa 14-yqshamaýdanǵa Áýlıeata ataýy berilgen edi. Alaıda, ol qaladaǵy dál osy attas aýdan aýmaǵyna kirgendikten, ataýlardyń qaıtalanýy túsinbeýshilikke alyp kelip jatyr

Mundaı jaǵdaıda qaı ataýdyń búkil aýdanǵa, qaısysynyń tek yqshamaýdanǵa qatysty ekeni anyq bolmaı qalýda.

Sondaı-aq bul memlekettik organdardyń jumysynda, resmı qujattarda, izdeý júıelerinde jáne kartografııalyq servısterde qıyndyq týǵyzǵan. Osy sebepti yqshamaýdan ataýyn ózgertý týraly sheshim qabyldandy.

Jańa ataý – Balaýsa – belgili bir tarıhı nemese folklorlyq tulǵanyń esimi emes. Bul sóz halyq arasynda jastyqpen, sergektikpen jáne jańa bastamalarmen túsindiriledi.

Qazir yqshamaýdanda qurylys qarqyndy júrip jatyr. Damý josparyna sáıkes, munda aldaǵy jyldary 145 turǵyn úı – 64 taýnhaýs pen 81 kópqabatty úı boı kóteredi.

Sondaı-aq eki mektep, úsh balabaqsha, onkodıspanser, kópsalaly aýrýhana, salalyq emhana, lıtseı-ınternat, Dostyq saraıy, ınnovatsııalyq shyǵarmashylyq ortalyq, sport-saýyqtyrý kesheni, ınjenerlik nysandar men kásipkerlik ortalyqtar salynady.

Ákimdiktiń málimetinshe, bul jerde shamamen 14,4 myń adam turatyn bolady.

Buǵan deıin habarlaǵanymyzdaı, Tarazda shýly saýda ortalyǵy sot sheshimimen oqshaýlanady.