Tarazda «Áýender álemi» alańy ashyldy
TARAZ. QazAqparat – Jambyl oblysynyń 80 jyldyǵyna oraı oblys ortalyǵynda «Áýender álemi» alańynyń saltanatty ashylý rásimi ótti, dep habarlaıdy QazAqparat.
Nysan Y.Dúkenuly atyndaǵy qalalyq Mádenıet úıiniń mańynda ornalasqan. Aýmaǵy 700 sharshy metrden asady. Buǵan deıin qaraýsyz jatqan alań mańyndaǵy alleıa qaıta jańǵyrtylyp, qalpyna keltirilýde.
Aıta keteıik, elimizdiń atyn álemge tanytyp júrgen mýzyka óneri qaıratkerleriniń shyǵarmashylyǵyn nasıhattap, ónegeli ómir jolyn búgingi urpaqqa úlgi etý maqsatynda ashylǵan alańnyń ortasyna óner ıeleriniń qurmetine arnalǵan stella qoıylǵan. Onyń bıiktigi – 6,5 metr. Stelanyń aınalasyna otyz tuǵyr tas ornatylǵan. Olarǵa qoıylǵan alpys juldyz belgisine elimizdiń mádenıetine úlken úles qosqan tulǵalar men óner juldyzdarynyń esimderi jazylǵan. Stellanyń tuǵyryna J.Jabaev, B.Sholaq, Y.Dúkenuly, K.Ázirbaevtyń óner týraly qanatty sózderi qashalyp jazylǵan.
Nysannyń ashylý saltanatynda Qazaqstannyń jáne Qyrǵyzstannyń Halyq ártisi, Qazaqstan Respýblıkasynyń memlekettik syılyǵynyń laýreaty Altynbek Qorazbaev sóz sóılep, keıingi jyldardaǵy óńirdegi órkendi ister týraly aıta kele, rýhanııat pen mádenıet baǵytynda atqarylyp jatqan júıeli jumystarǵa toqtaldy. Sondaı-aq ol ashylǵaly otyrǵan nysannyń oblystan shyqqan óner adamdaryna degen sheksiz qurmettik belgisi ekendigin marqaıa jetkizdi. Shara barysynda aımaq basshysy Asqar Myrzahmetov «Áýender álemi» alańyna esimderi jazylǵan ónerpazdarǵa sertıfıkattar tabystap, óner men ómirde sáttilik tiledi.
Jambyl óńiri elimizdiń óner áleminde qanatyn keńge jaıǵan jaısańdardan kende emes. Olar tek oblysqa ǵana emes, barsha elimizdiń maqtanyshyna da aınalýda. Qazaq án-kúı ónerindegi tulǵalar Balýan Sholaq, Yqylas Dúkenuly, Kenen Ázirbaev, Ilıa Jaqanov, Altynbek Qorazbaev, Mels Ózbekov jáne taǵy basqalardy aıryqsha atap aıtýǵa bolady. Búginde osy tulǵalardyń iziń jalǵap kele jatqan talanttar az emes. Bul alań solardyń ónerine degen qurmet belgisi desek qatelespeımiz.
