Tarazda aýdarylǵan avtobýstyń júrgizýshisi rýlge ıe bola almaı qalǵan - ІІD
TARAZ. QazAqparat - Jambyl oblystyq ІІD Taraz qalasynda aýdarylyp qalǵan avtobýsqa qatysty túsinikteme berdi, dep habarlaıdy QazAqparat tilshisi.
Eske salaıyq, búgin Tarazdaǵy oqıǵanyń fotosýretteri áleýmettik jelide tarap ketken edi. Onda Tóle bı dańǵyly men Mechnıkov kóshesiniń qıylysynda, «Ortalyq meshit» aıaldamasynyń mańynda aýdarylǵan avtobýstyń jatqanyn kórýge bolady.
«29 mamyrda 7.30-da Tóle bı kóshesinde «Dong Feng» markaly №46 qalalyq marshrýty aýdarylǵan edi. Avtobýs búgin jolaýshylardy tasymaldaýǵa shyqpaǵan. Sondyqtan avtobýstyń salonynda 24 jastaǵy júrgizýshiden basqa eshkim bolmaǵan. Medıtsınalyq tekserý qorytyndysyn sáıkes, ol mas bolmaǵan. Jol apatynan eshkim zardap shekpegen», - delingen baspasóz habarlamasynda.
Jambyl oblystyq ІІD-niń málimetinshe, oqıǵaǵa qatysty Ákimshilik quqyqbuzýshylyq kodeksiniń 610-baby 1-bóligi boıynsha ákimshilik hattama toltyrylǵan.
