Tarazda atysqa qatysty oqıǵany jasyrǵan №1 qalalyq aýrýhananyń dárigeri jumystan bosatyldy

TARAZ. QazAqparat - 19 maýsymda Taraz qalasynda bolǵan oqıǵany tergeý barysynda oblystyq prokýratýra der kezinde ishki ister organdaryn aqparattandyrý jónindegi zań talaptarynyń buzylǵandyǵyn anyqtady.

Eske sala ketsek, 19 maýsymda «Boryshker» is-sharasy barysynda, Taraz qalasyndaǵy shaǵyn aýdannyń birinde kúdiktini ustaý barysynda eki adam jaraqat aldy, onyń biri kúdiktiniń izine túsken ýchaskelik polıtsııa ınspektory bolatyn.

«Tergeý barysynda «krımınaldyq kıkiljiń» kezinde A. Esimdi azamat atys qarýynan jaraqat alǵan, ol týraly aýrýhananyń jaýapty qyzmetkerleri quqyq qorǵaý organdaryna habarlamaǵan. Zańsyzdyqty joıý jónindegi oblystyq prokýratýra usynymy boıynsha №1 qalalyq aýrýhananyń dárigeri N.Karpovıch jumystan bosatyldy, jaýapty tulǵalar tártiptik jaýapkershilikke tartyldy. Qadaǵalaý aktisiniń engizilýine 19 maýsymda Tarazdaǵy oqıǵa barysynda qylmyskerlerdiń qarsylyq kórsetýi saldarynan polıtsııa qyzmetkeri B.Tilenshıevtiń aýyr jaraqat alýy negiz boldy», delingen oblystyq prokýratýranyń baspasóz habarlamasynda.

Qadaǵalaý organy der kezinde ishki ister organdaryn osy is týraly aqparat  bergende ary qaraıǵy qylmystyq áreketterge jol berilmeı, polıtsııa qyzmetkerleriniń jaraqat alýynyń aldyn alýǵa múmkindik týar edi. Qazir oq tıip jaraqat alǵan polıtsııa serjanty Bekjan Tilenshıev qalalyq aýrýhanada aýyr halde jatyr.

«Bekjan Tilenshıevtiń erliginiń, sondaı-aq ýchaskelik polıtsııa ınspektory D.Zaýyrbektiń naqty ári bilikti is-áreketteriniń  arqasynda qylmysker qarýsyzdandyrylyp, ustaldy. Jambyl oblystyq ІІD basshylyǵy polıtsııa qyzmetkerleri Danııar Máskeýbekuly Zaýyrbek men Bekjana Mamyruly Tilenshıevti Qazaqstan Respýblıkasynyń memlekettik marapattaýǵa usynym berdi», - dep habarlaıdy Jambyl oblystyq ІІD baspasóz qyzmeti.