Tarazda astyqpen qamtamasyz etý jónindegi memorandýmǵa qol qoıyldy
ASTANA. Qyrkúıektiń 2-si. QazAqparat. «QazAgro» Ulttyq basqarýshy holdıngi» AQ, Jambyl oblysy ákimdigi, «Astyq odaǵy», «Astyq óńdeýshiler men naýbaıshylar odaǵy» búgin Taraz qalasynda astyqpen qamtamasyz etý jónindegi memorandýmǵa qol qoıdy,
dep habarlaıdy «QazAgro» UH baspasóz qyzmeti.
Memorandýmnyń negizgi maqsaty - 1 surypty formaly nannyń baǵasyn negizsiz kóterýge jol bermeý.
Memorandýmnyń talaptaryna sáıkes, Ákimdik nan pisiretin kásiporyndardy belgili baǵa boıynsha unmen qamtamasyz etetin astyq óńdeýshi-operatorlardy belgileıdi.
«QazAgro» holdıngi óziniń enshiles kompanııasy - «Azyq-túlik kelisim shart korporatsııasy» UK» AQ qoldaǵy astyq qorynan operatorlardy 26 500 teńge baǵamen astyqpen qamtamasyz etedi.
Azyq-túlik korporatsııasy astyqty jetkizýdi 2010 jyldyń 1 qyrkúıeginen bastap 2011 jylǵy 1 qazanǵa deıingi kezeńde aı saıynǵy qajettiligine sáıkes keste boıynsha júzege asyrady.
Azyq-túlik korporatsııasynyń astyq resýrsy kestege sáıkes ákimdiktiń ótinishin qanaǵattandyrmaǵan jaǵdaıda «Astyq odaǵy» operatordy kórsetilgen baǵa boıynsha astyqpen qamtamasyz etýdi óz mindetine alady.
Astyq óńdeý uıymdarynyń astyqty maqsatty paıdalanýdy qamtamasyz etýdi baqylaý jáne nan ónimderine baǵany negizsiz kóterýge jol bermeý Ákimdiktiń mindetine júkteledi.
Budan buryn aıtylǵandaı, Qazaqstan Respýblıkasy Prezıdenti N.Á. Nazarbaevtyń tapsyrmasyn oryndaý maqsatynda Ekonomıkany jańartý jónindegi memlekettik komıssııanyń ústimizdegi jylǵy 26 tamyzdaǵy otyrysynda «QazAgro» ulttyq basqarýshy holdıngi» AQ 26 500 teńge baǵamen 2 mıllıon tonna astyq satyp alý týraly sheshim qabyldandy. Satyp alýdy qarjylandyrýdyń kózi Holdıngke respýblıkalyq bıýdjetten berilgen qarajat, sondaı-aq QazAgronyń menshikti qarajaty bolyp tabylady. Satyp alýdy Azyq-túlik korporatsııasy oblystar arasynda eginniń jalpy túsimine mólsherles bólinetin belgilengen kvota boıynsha júrgizedi.
Atalǵan sharalar aýylsharýashylyq taýaryn óndirýshilerge ózderiniń qajet tabys deńgeıin saqtaýǵa múmkindik beredi, eldiń azyq-túlik qaýipsizdigin qamtamasyz etedi, sondaı-aq sharýalardyń esep aıyrysýy úshin qarajatpen qamtamasyz etý arqyly astyq sharýashylyqtarynyń qarjylyq tólempazdyǵyn jaqsartady.
