Tarazda Asqar Toqpanovqa eskertkish qoıyldy
TARAZ. QazAqparat – Búgin Jambyl oblysynyń 80 jyldyǵy atap ótilýde. Jańa formatta ótip jatqan mereıtoı barysynda birqatar nysandar paıdalanýǵa berildi. Eń aldymen oblystyq qazaq drama teatrynyń aldyna ornatylǵan Asqar Toqpanovtyń eskertkishi ashyldy, dep habarlaıdy QazAqparat.
Jambyl oblysynyń 80 jyldyǵyna arnalyp ashylǵan rýhanı nysandardyń kóshin A.Toqpanovtyń eskertkishi bastady. Asqar Toqpanov oblystyq qazaq drama teatrynyń negizin qalaǵan, ondaǵy shyǵarmashylyq ujymynyń kásibı biliktiligin jetildirýge óz qoltańbasyn qaldyrǵan elimizge tanymal rejısser.
Eskertkishtiń lentasyn KSRO jáne Qazaqstannyń Halyq ártisi, Qazaqstannyń Eńbek Eri Asanáli Áshimov pen Qazaqstan Teatr qaıratkerleri odaǵynyń tóraǵasy, Asqar Toqpanovtyń shákirti, Qazaqstannyń Halyq ártisi Tuńǵyshbaı Jamanqulov, Qazaqstannyń halyq ártisi, professor Esmuhan Obaev qıdy. Olar tulǵa týraly esti estelikteri men taǵylymdy oılaryn ortaǵa salyp, A.Toqpanovtyń eskertkishiniń oblystyq teatr aldynan ashylyp otyrǵanyn óte oryndy sheshim bolǵanyn basa aıtty. Eskertkishke QR Mádenıet jáne sport mınıstri A.Raıymqulova, oblys ákimi A.Myrzahmetov jáne birqatar zııaly qaýym ókilderi yqylas gúlin qoıdy.
Asqar Toqpanov — joǵary bilimdi túńǵysh ulttyq kásibı rejısser, Qazaqstan teatr óneriniń kórnekti qaıratkerleriniń biri, Qazaqstannyń halyq artısi. Ol 1915 jyly qazan aıynda Almaty oblysynyń Іle aýdanyna qarasty № 2 aýylda dúnıege kelgen. 1939 jyly Máskeýdiń memlekettik A.V.Lýnacharskıı atyndaǵy teatr óneri ınstıtýtynyń rejısserlik fakýltetin támamdaǵan soń respýblıkamyzdyń teatr ómirine zor eńbek sińirgen tulǵa.
Aıta keterlik taǵy bir jaıt, búgingi is-shara barysynda A.Toqpanovtyń ómiri men shyǵarmashylyǵy jónindegi «Toqpanov tulǵasy» atty estelik kitaptyń tusaýkeser rásimi ótti. Qonaqtar úshin A.Toqpanovtyń qyzmet joly, eńbekteri, nagradalary, shákirtteri jaıly fotostend uıymdastyrylyp, tulǵa týraly derekti fılm kórsetildi.
Sonymen qatar, búginde Jambyl oblystyq qazaq drama teatryna qazaqtyń tuńǵysh kásibı rejısseri, halyq ártisi Asqar Toqpanovtyń esimin berý boıynsha tıisti jumystar júrgizilýde. Respýblıkalyq onomastıkalyq komıssııadan qoldaý tapqan bul usynys boıynsha qazir Úkimet qaýlysynyń jobasy daıyndalýda.
Oblys teatryna tulǵanyń esimin berý - ónersúıer qaýymnyń kópten bergi arman-tilegi bolatyn. Óıtkeni qazaq óneriniń damýyna ólsheýsiz úles qosqan tulǵa óz eńbek jolynda Jambyl oblystyq qazaq teatrynda da eleýli eńbek etken. Kóptegen qoıylymdar sahnalap, shákirtter tárbıelegen.
Bul usynysty osydan 10-15 jyl buryn Asanáli Áshimov, Sábıt Orazbaev, Tuńǵyshbaı Jamanqulov sekildi teatr sańlaqtary kóterip, usynys hat jazǵanymen, jaýapsyz qalǵan edi. Oblys ákimi Asqar Isabekuly osy máseleni Úkimet, Mádenıet mınıstrligi deńgeıinde kóterip, ıgi bastama óz sheshimin tabýda.
A. Toqpanov esimi buǵan deıin elimizde eshqandaı teatr men óner ujymyna berilmegen. Al 1936 jyly qurylǵan oblystyq qazaq drama teatry osy jyldar boıy birde-bir tulǵanyń atymen atalmaǵan. Osy turǵydan alǵanda bul bastama kópshilikten zor qoldaý tabýda.
Teatr rejısseriniń músinin belgili músinshi Momysh Sultan jasap shyqty. Onyń qurylysyna tanymal metsenat «Super pharm» jaýapkershiligi shekteýli seriktestiginiń dırektory Qaırat Qaımoldaev demeýshilik etken.
