Tarazda ashylǵan ortalyqta mektep oqýshylary jańa tehnologııalardy meńgerýde
ASTANA. QazAqparat - Taraz memlekettik pedagogıkalyq ınstıtýtynyń janynan ashylǵan tájirıbelik ortalyqta jambyldyq mektep oqýshylary jańa tehnologııalardy meńgerip, zertteý jumystaryn júrgizýde.
Bul týraly TarMPI-dyń Aqparattyq-ımıdjdik qyzmetiniń jetekshisi Jandar Asan məlim etti, dep habarlaıdy QazAqparat.
Búginde jastardyń zamanaýı tehnologııalardy meńgerýi jáne ony ómirde qoldana bilýi úlken mańyzǵa ıe. Osy oraıda pedagogıkalyq ınstıtýtta tájirıbelik-ınnovatsııalyq ortalyq qurylyp, arnaıy joba iske asyrylýda. Maqsat - stýdenttermen qatar mektep oqýshylaryn ǵylymı-zertteý jumystaryna tartý arqyly olardyń qyzyǵýshylyǵyn arttyrý jáne zııatkerlik áleýetin kóterý.
Zerthanalyq jumystar 6 baǵyt boıynsha júrgizilýde. Instıtýt ǵalymdary hımııa, bıologııa, fızıka jáne robototehnıka salalary boıynsha zertteý jumystarynyń qyr-syrymen tanystyryp, tyń oılaryn ortaǵa salýda. Keshendi tájirıbe júrgizýge pedagogıkalyq ınstıtýttyń bazasynda tolyq jaǵdaı jasalǵan. Oqý ornynda stýdentter men mektep oqýshylarynyń robototehnıka boıynsha ǵylymı-tehnıkalyq shyǵarmashylyq qabiletin damytý maqsatynda «Elektrotehnıka», «Radıotehnıka», «Elektronıka negizderi» jáne «Mekteptegi robototehnıka» oqý-zerthanalary jumys isteıdi. Dárishanalar Lego, Tetrix, Arduino robottarymen, zamanaýı qurylǵylarmen, oqý-ádistemelik jáne baǵdarlamalyq nusqaýlyqtarmen jabdyqtalǵan.
Instıtýtta tájirıbeden ótken ozyq oıly oqýshylardyń ǵylymı jobalary ortalyqta toptastyrylady. Eńbekterdi óndiriske engizý isi de jan-jaqty qarastyrylmaq. Búginde pedagogıkalyq oqý orny óńirdegi birqatar kásiporyndarmen kelisimge otyrǵan. Osyǵan oraı, ınstıtýt stýdentteri túrli óndiris zerthanalarynda óz jobalaryn tájirıbeden ótkizýde.
