Tarazda aryqty tazalaý barysynda belgisiz adamnyń máıiti tabyldy
TARAZ. QazAqparat – Taraz qalasyndaǵy aryqqa tazalaý jumystaryn júrgizip jatqan jumysshylar belgisiz adamnyń máıitin taýyp aldy, dep habarlaıdy QazAqparat tilshisi.
Taraz qalasy Polıtsııa basqarmasyna jergilikti turǵynnan oblys ortalyǵyndaǵy Qarasý (5) jáne Jansaıa (11) móltek aýdandarynda ornalasqan aryqtyń jaǵalaýynan qaıtys bolǵan adamnyń máıiti tabylǵandyǵy týraly habarlama kelip túsken. Bul týraly oblystyq polıtsııa departamentiniń baspasóz qyzmeti habarlady.
«Atalǵan derek boıynsha jedel-tergeý tobynyń qyzmetkerlerimen aryq ishine qaraý júrgizilip, máıittiń qaldyqtary anyqtaldy.
Sonymen qatar, habar bergen qala turǵynynan jaýap alý barysynda onyń «Jasyl el-Taraz» mekemesinde jumys atqaratyny anyqtalyp, aryqqa tazalaý jumystaryn júrgizý barysynda qamystyń arasynan adamnyń máıitin kórip, tez arada polıtsııa qyzmetkerlerin shaqyrǵanyn aıtqan»,-delingen vedomtsvo habarlamasynda.
Bul derekke qatysty Taraz qalasynyń Polıtsııa basqarmasymen sotqa deıingi tergep-tekserý óndirisi bastalyp, tabylǵan máıit súıekteriniń qaldyqtaryna sot-medıtsınalyq saraptama taǵaıyndaldy. Qazirgi ýaqytta onyń jeke basyn anyqtaý maqsatynda jedel-izdestirý is-sharalary júrgizilýde.
