Tarazda antıbıotıkti arnaıy retseptisiz satqan dárihanashyǵa aıyppul salyndy
TARAZ. QazAqparat – Taraz qalasynda ornalasqan dárihanada antıbıotıkti dárigerdiń arnaıy retseptisiz satqany anyqtaldy, dep habarlaıdy QazAqparat.
Atalǵan olqylyq «SK-Farmatsııa – Adaldyq alańy» jobasy barysynda anyqtalǵan. Joba aıasynda «Qupııa satyp alýshy» ádisimen Taraz qalasynda ornalasqan birqatar dárihanalarǵa monıtorıng júrgizilipti. Monıtorıng kezinde «Jasulan jáne K» dárihanasynda «Tseftrıakson» antıbıotıkteri dárigerdiń arnaıy retseptisiz satylǵany anyqtaldy. Bul týraly «Jambyl – adaldyq alańy» jobalyq keńsesi habarlady.
«Atalǵan másele boıynsha tıisti shara qoldaný úshin Jambyl oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentine aıǵaq qujattar men aryz jazyldy. Nátıjesinde «Jasulan jáne K» dárihanasynyń qyzmetkeri M. atty azamatshaǵa QR Ákimshilik quqyq buzýshylyq týraly Kodeksiniń 810, 811 baptaryna sáıkes 92 785 teńge kóleminde aıyppul salyndy. Aıyppul aǵymdaǵy jyldyń 10 naýryz kúni tolyǵymen tólendi» delingen habarlamada.
Sondaı-aq, bul baǵyttaǵy jumystar aldaǵy ýaqytta da turaqty túrde júrgiziletindigi aıtylǵan.
