Tarazda alıment tólemeıtinderdiń túr-álpetin tanıtyn vıdeokameralar ornatylýda
Búginde Taraz qalasynyń kóshelerinde 206 beınebaqylaý kamerasy jumys istep tur. Zamanaýı qondyrǵylar búginde óz tıimdiligin kórsetip otyr. Máselen, jyl bastalǵaly beri olardyń kómegimen 65 qylmys ashylyp, 2 myńǵa jýyq ákimshilik quqyqbuzýshylyq tirkeldi. Sondaı-aq, myńǵa tarta jol erejesin buzý deregi anyqtalyp, 9 mıllıon teńgege jýyq aıyppul óndirilgen.
Endi qoǵamdyq qaýipsizdikti qamtamasyz etý maqsatynda ıntellektýaldyq beınebaqylaý júıesi engizilmek. Tsıfrlandyrýdyń jol kartasy bekitildi.
Bıyl Tarazda taǵy 528 beınekamera alý josparda bar. Qazir shaharda taldaý jasalyp quqyqbuzýshylyq eń kóp jasalatyn oryndar anyqtaldy. Qondyrǵylar birinshi kezekte shahardaǵy yqshamaýdandar, bazarlar men halyq kóp jınalatyn oryndarǵa ornatylmaq.
«Bul kameralardyń ıntellektýaldyq beınebaqylaý júıesi bar. Onyń ishinde, tulǵalardy tanýdyń bıometrııalyq parametrlerin paıdalaný arqyly adamdardy tanı alady. Qazirgi zamanǵy zııatkerlik fýnktsııalarǵa ıe», - deıdi oblystyq Polıtsııa departamenti tehnıkalyq qyzmet basqarmasynyń bólim basshysy Asqar Joraev.
Aqyldy kameralar izdeý jarııalanǵan adamdar men qylmyskerlerdiń túr-álpetin túsirip, avtomatty túrde aqparat bazasyna engizedi. Tipti alıment tólemeı júrgenderdi de anyqtap beredi. Buǵan 7 mıllıard teńge kóleminde qarajat jumsaý kózdelip otyr. Joba memlekettik-jekeshelik áriptestik aıasynda júzege asyrylmaq.
«Jobany júzege asyrýǵa qomaqty qarajat kerek. Sondyqtan oǵan ınvestorlar tartylady. Memleket beınekameralardy satyp alýǵa, ornatýǵa jumsalǵan qarjyny bir kúnde tólemeıdi. Shyǵyndar 5 jyl ishinde óteledi. Qazirdiń ózinde tyń bastamany qolǵa alýǵa birneshe kompanııa nıet bildirip otyr», - dep atap ótti oblystyq Investorlarǵa qyzmet kórsetý, jobalyq basqarý jáne tsıfrlandyrý ortalyǵynyń jetekshisi Damır Egizbaev.
Sondaı-aq málim bolǵandaı, endi Jambyl oblysynyń joldarynda jyljymaly fotoradar jumys isteıtin bolady. Bul keshen kólik júrgizýshileri arasynda «úsh aıaq», ıaǵnı atalyp ketken. Qondyrǵynyń ereksheligi jol erejesin buzǵandardy sol mezette túsirip, aqparatty jedel túrde bazaǵa tirkep otyrady. Qondyrǵy kez kelgen jerge ornatyla beredi. Oǵan polıtsııa qyzmetkerleri quqyly. Al onyń ornatylǵandyǵy jóninde aldyn ala belgi qoıylmaıdy.