Tarazda áli qalpyna keltirý jumystary júrip jatyr
Tarazdaǵy qańtar oqıǵasy kezinde 6 memlekettik ǵımarat (oblys ákimdigi apparatynyń, «Nur Otan» partııasy oblystyq fılıalynyń, polıtsııa departamentiniń, qalalyq polıtsııa basqarmasynyń úsh ǵımaraty) zaqymdandy. Búginde olardy qalpyna keltirý jumystaryna 720 adam, 48 birlik tehnıka jumyldyrylǵan.
Qazirgi tańda oblystyq polıtsııa departamentiniń ǵımaraty kúrdeli jóndeýden ótip jatyr. Oblys ákimi Jedel basqarý ortalyǵyndaǵy jumystardy aqpan aıynyń sońyna deıin aıaqtaýdy tapsyryp, qoǵamdyq qaýipsizdik pen quqyqtyq tártipti qamtamasyz etý sharalarynyń mańyzdylyǵyn atap ótti.
Taraz qalalyq polıtsııa basqarmasynda jóndeý jumystary 80 paıyzǵa aıaqtalyp, ınjenerlik-kommýnıkatsııalyq ınfraqurylym jelileleri júrgizilýde. Kelesi aptada mundaǵy qyzmetkerler óz kabınetterine kóshe bastaıdy.
Taraz qalalyq polıtsııa basqarmasynyń №1 polıtsııa bólimshesinde terezeler, esikter, jylytý jáne sýmen jabdyqtaý júıeleri aýystyrylýda.
Merdiger «QazMunaıQurylys» JShS Taraz qalasy polıtsııa basqarmasynyń ýaqytsha ustaý ızolıatorynda qaıta jóndeý jumystaryn tolyǵymen aıaqtaǵan.
«Nur Otan» partııasy oblystyq fılıalynyń ǵımaratynda barlyq terezeler men esikter, shatyrlar men ınjenerlik jeliler aýystyrylyp, qasbetteri jóndeýden ótedi. Aımaq basshysy ǵımarattyń tarıhı kelbetin saqtaýǵa aıryqsha nazar aýdarý kerektigin basa aıtty. Ortalyq alańdaǵy barlyq nysandar biryńǵaı úlgide bolýy tıis.
Berdibek Saparbaev «Tarazstroı-2004»JShS-ne oblys ákimi apparatynyń ǵımaratynyń kúrdeli jóndeý jumystaryn aqpan aıynyń sońyna deıin aıaqtaýdy tapsyrdy. Jaýapty tulǵalarǵa jumystyń barysy men sapasyn qatań baqylaýda ustaýdy júktedi.
Aımaq basshysy sondaı-aq zardap shekken kásipkerlik nysandardy qalpyna keltirý jumystarynyń barysyn da tekserdi.
Oblys boıynsha barlyǵy 25 shaǵyn jáne orta bıznes sýbektileri búlingen desek, olar qazirgi ýaqytta shtattyq rejımde jumys istep tur. Kásipkerlikke keltirilgen shyǵyndy óteý sharalary bastalǵan.
