Tarazda Alǵys aıtý kúnine oraı 1 myń túp aǵash otyrǵyzyldy
Merekelik sharaǵa jınalǵandar aldymen júzdegen etnos ókilderin qushaǵyna basqan qazaq halqynyń baýyrmaldyǵyn aıshyqtaıtyn «Qazaq halqyna myń alǵys» monýmentine gúl shoqtaryn qoıdy.
Aıta ketý kerek, saltanatty sharalar barysynda barlyq sanıtarlyq talaptardyń saqtalýyna asa mán berildi.
Aımaq basshysy óziniń quttyqtaý sózinde Alǵys aıtý kúni – birlik, kelisimniń jáne ózara syılastyqtyń jarqyn merekesi ekendigin aıryqsha atap ótti.
«Táýelsizdik jyldarynda biz basty baılyǵymyz – beıbitshiligimiz ben yntymaǵymyzdy odan ári nyǵaıta tústik. Al bul óz kezeginde elimizdiń ekonomıkalyq damýynyń negizi bolyp tabylatyn turaqtylyǵymyzdyń kepili bolyp tabylady. Árbir azamat ulttar dostyǵyn nyǵaıtýǵa óz úlesin qosýy tıis. Osy oraıda men Alǵys aıtý kúni koronavırýs pandemııasynyń qıyn sátterinde halyqqa kórsetken kómek-qoldaýy úshin barlyq etnomádenı birlestikter men oblys jastaryna alǵysymdy bildirgim keledi. Osyndaı kúrdeli kezeńnen aman-esen ótýi úshin bizdiń birlikte bolýymyz asa mańyzdy. Oblys basshylyǵy atynan barsha jambyldyqtardy Alǵys aıtý kúnimen quttyqtaımyn! Barlyq qýanysh pen qıyndyqta bir-birimizge árdaıym demeý bolyp, elimizde jáne ár shańyraqta tynyshtyq ornap, bereke-birligimizdiń artýyn tileımin»,- dedi B.Saparbaev.
Etnomádenı birlestikter ókilderiniń atynan «Taraz qalasynyń ózbek etnomádenı ortalyǵy» qoǵamdyq birlestiginiń tóraǵasy Abdýrahman Zaınýtdınov sóz alyp, oramdy oılaryn ortaǵa saldy.
«Alǵys aıtý kúni merekesi – kezinde bizge qushaǵyn aıqara ashyp, baýyryna basyp, qolyndaǵy barymen bólisken qazaq otbasylaryna degen qurmetimizdiń belgisi dep túsinemiz. Olar ózderiniń jaǵdaıy asa jaqsy bolmasa da, bizdi keýdemizden ıterip, dalaǵa qaldyrǵan joq. Munyń bári halyqtar dostyǵyn nyǵaıtýǵa yqpal etedi. Búgin men ystyq peıili men qoldaýy úshin qazaq halqyna alǵysymdy bildirgim keledi», - dedi ol.
№34 orta mekteptiń dırektory, dúngen etnomádenı birlestiginiń belsendisi Dınara Nuralıeva da arnaıy lebizin jetkizdi.
«Men elimizdi maqtan tutamyn, óıtkeni, júzdegen ult ókilderiniń mamyrajaı mekenine aınalǵan Qazaqstannan búginde barsha álem elderi úlgi alýda. Solardyń ishinde bizdiń dúngen ulty da bar. Biz qazaqtardyń ata-babalarymyzǵa tanytqan qonaqjaılyǵyn umytpaýymyz kerek. Bizdiń bolashaq urpaq aldyndaǵy paryzymyz – bizge deıin búlinbeı jetken beıbitshilik pen kelisimdi saqtap qalý», - dedi ol.
Merekelik sharalar etnomádenı birlestikterdiń halyq shyǵarmashylyǵy jáne ulttyq taǵamdar kórmesimen jalǵasty. Kelýshiler Jambyl oblysynda turatyn etnostardyń dástúrleri men ádet-ǵuryptarymen tanysýǵa, sondaı-aq ulttyq taǵamdarynan dám tatty.
Sondaı-aq, shara qonaqtary Alǵys aıtý kúnine oraı «Arbat-1» alleıasyna aǵash otyrǵyzý rásimine qatysty.
Mereke kúnderi oblys ortalyǵynyń aýmaǵynda barlyǵy 1000 túp aǵash otyrǵyzyldy desek, bul «qazaq halqyna myń alǵys» túsiniginiń mańyzyn arttyra túskendeı.
Aǵash otyrǵyzýǵa aımaq basshysy Berdibek Saparbaev ta qatysty.
Oblys ákimi etnomádenı birlestikterdiń ókilderimen birge shyrsha kóshetterin otyrǵyzyp, sý quıdy.
Máńgi jasyl aǵash sanalatyn ósimdik – máńgilik beıbitshilik pen Qazaqstan halyqtarynyń dostyǵyn beıneleıdi.
