Tarazda Alǵys aıtý kúni Qyrǵyzstannan kelgen qonaqtarmen birge atap ótildi
TARAZ. QazAqparat - Tarazda Alǵys aıtý kúni kórshiles Qyrǵyzstannan kelgen qonaqtarmen birge atap ótildi, dep habarlaıdy «QazAqparat» HAA tilshisi.
Talas oblysynan kelgen 20 adamdyq delegatsııany, tarazdyqtar «Aısha bıbi» shekara beketinde qarsy aldy.
Qonaqtarǵa bul merekeniń Qazaqstanda úshinshi márte ótkizilip jatqany jóninde málimet berildi. Alǵys aıtý kúni - elimizdegi ártúrli etnos ókilderiniń elimizdiń tarıhyna baǵa bere otyryp, qazaq halqyna alǵys aıtý kúni ekendigi túsindirildi.
Qyrǵyzstandaǵy Talas aýdany gýbernatorynyń orynbasary Azııat Jarqynalıeva, kórshiles jatqan eki oblystyń tyǵyz qarym-qatynasta ekendigin aıta kele, qazaqstandyqtardyń qonaqjaılyǵyna rızashylyǵyn bildirdi.
Merekelik baǵdarlamada qazaqtyń ulttyq oıyndary men birge etnomádenı birlestikterdiń kontserti usynyldy. Sahnada qazaq, ýkraın, nemis, káris, orys ánderi shyrqaldy.
Budan keıin Qyrǵyzstannan kelgen qonaqtar aǵash otyrǵyzý rásimine qatysyp, Tarazdaǵy tanymdyq oryndardy aralap kórdi.
«Mereke aıasynda «Meıirimdi kórshilerge rahmet!» atty jalpyrespýblıkalyq aktsııa ótýde. Bıyl dál osyndaı is-shara Talasta «Qazaqstan - dostyq pen tatýlyqtyń mekeni» atty festıval uıymdastyrylǵan bolatyn. Qyrǵyzstandaǵy bizdiń baýyrlas dostarymyz búgin merekeni bólisýge kelip otyr»,-dedi oblystyq ishki saıasat basqarmasynyń basshysy Ǵalııa Boranbaeva.
Esterińizge sala keteıik, 2015 jyly Assambleıanyń 20 jyldyǵyna oraı Elbasy 1 naýryzdy Alǵys aıtý kúni retinde merekeleýdi usynǵan bolatyn.
