Tarazda «Alǵys aıtý» kúni aıryqsha atalyp ótti
Bul kúni jambyldyqtar erte tańnan «Kóne Taraz» tarıhı-etno-mádenı kesheniniń aýmaǵyna qaraı aǵyldy. Kóp ultty Taraz shahary – naǵyz dostyq mekenine aınalǵandaı. Qaıda qarasańyz da kózderine qýanysh uıalap, shattyqtan júzderi bal-bul janǵan adamdardy baıqaýǵa bolady. Túrli etnos ókilderi ulttyq kıimderin kıip, dástúrleri men ónerlerin ortaǵa salyp, taǵamdaryn usynyp jatty...
Qazaqstannyń Halyq ártisi Tuńǵyshbaı Jamanqulov pen oblys ákimi Berdibek Saparbaev etnomádenı ortalyqtardyń ókilderi ázirlegen túrli taǵamdardan dám tatyp, mýzykalyq nómirlerin tamashalady.
Sondaı-aq, mereke barysynda et jáne sút ónimderin, bal jáne jemis-jıdekterdi usynǵan jergilikti kásipkerler de az bolmady.
Budan keıin saltanatty shara uıymdastyryldy. Onda úlken ekran arqyly Qazaqstan halqynyń birligi men yntymaǵy týraly baıandalatyn beınesıýjet kórsetildi.
- Birlik – bizdiń basty jetistigimiz. Qoǵamda beıbitshilik pen tynyshtyq bolǵanda ǵana ekonomıka, áleýmet, mádenıet, ǵylym damı alady. Biz ata-babalarymyzdyń amanaty bolǵan – rýhanı qundylyqtarymyz ben dástúrimizdi úzip almaýymyz kerek. El Táýelsizdiginiń 30 jyly ishinde Qazaqstannyń Tuńǵysh Prezıdenti – Elbasy Nursultan Nazarbaev ultaralyq jáne konfessııaaralyq qatynastardy damytýdyń biregeı qazaqstandyq modelin qurýdyń bastamashysy bola bildi. Bizdiń elimizde alǵash ret Qazaqstan halqy Assambleıasy sııaqty qoǵamdyq kelisim ınstıtýty quryldy. Sizderdiń otbasylaryńyzǵa densaýlyq pen ıgilik, jerimizde beıbitshilik pen kelisim ornaı bersin,- dep túıindedi oblys ákimi óz sózin.
Al óner tarlany Tuńǵyshbaı Jamanqulov kezinde qazaqtar jer aýdarylǵan halyqtarǵa kómek qolyn sozyp, olarmen sońǵy úzim nanymen bóliskenin aıtyp ótse, kúrd dıasporasynyń kóshbasshysy Sabrı Asanov qazaqtarǵa kóńilderiniń keńdigi men qonaqjaılyǵy úshin úlken alǵysyn bildirdi.
Oblys aýmaǵynda tirshilik keship jatqan ózge de etnostardyń ókilderi júrekjardy lebizderin jetkizdi.
Aıta keteıik, búginde Jambyl oblysynda 80-nen astam etnos ókilderi turady.
Shara barysynda ulttyq kıimdegi bir top jambyldyqtardyń «Atameken» ánin áýelete oryndap, beıbitshilik sımvoly – aq kógershinderdi aspanǵa ushyrǵany merekeniń mazmunyn asha tústi.
Óńir basshysy Berdibek Saparbaev jastardy damytý, toleranttylyq qaǵıdattaryn jáne qarym-qatynastyń joǵary mádenıetin qalyptastyrý máselelerine basa nazar aýdardy.
Óz kezeginde merekege belsene qatysqan birqatar etnos ókilderimen tildesip, olardyń oı-pikirlerin qulaq túrgen edik. Solardyń biri qazaq dalasyna ótken ǵasyrdyń 30-shy jyldary qonys aýdarylǵan polıak ultynyń ókili Natasha Kalkova.
«Kezinde túrli sebeppen qonys aýdaryp kelgenderge qazaqtardyń qalaı kómekteskeni, qıyn ýaqytta qol ushyn berip, jasaǵan jaqsylyǵy týraly biz jaqsy bilemiz. Ol týraly bizdiń otbasymyzda árdaıym aıtylyp otyrady», - deıdi N.Kalkova.
Al, Hýrshed Eshmatov oblysta myńnan astam tájikter turyp jatqanyn, olar aımaqtyń qoǵamdyq ómirine belsendi aralasyp, áleýmettik-ekonomıkalyq damýyna óz úlesin qosyp jatqanyn jetkizdi.
Ýkraındyq Tatıana Polışýk pen uıǵyr EMB basshysy Muhabbat Týrdyeva Qazaqstanda ultaralyq kelisimniń berik deńgeıi saqtalyp otyrǵandyǵyn aıryqsha atap ótip, ony buzýǵa eshqandaı negiz joqtyǵyn basa aıtty.
M.H.Dýlatı atyndaǵy TarMÝ-dyń áskerı kafedrasynyń oqytýshysy Ońalbek Qurmanbek elimizde tirshilik keship otyrǵan ózge halyqtarǵa qurmetpen jáne dostyq peıilmen qaraý – qazaq halqynyń qanyna bitken qonaqjaı, aqkóńil qasıetteriniń kórinisi ekendigine nazar aýdartty.
