Tarazda alǵash ret mı qantamyry zaqymdalǵan naýqasqa ota jasaldy
TARAZ. QazAqparat – Taraza qalasynda alǵash ret belgili neırohırýrg, «100 jańa esim» jobasynyń jeńimpazy Myńjylqy Berdiqojaev mı qantamyry zaqymdalǵan naýqasqa ota jasady, dep habarlaıdy QazAqparat tilshisi.
Almaty qalasyndaǵy Ortalyq klınıkalyq aýrýhanasynyń neırohırýrgııa bóliminiń meńgerýshisi, respýblıkamyzǵa belgili neırohırýrg, «100 jańa esim» jobasynyń jeńimpazy Myńjylqy Berdiqojaev Taraz qalalyq kópbeıindi aýrýhanasy kelip, «Mı tamyrlarynyń anevrızmasy men arterıovenozdy malformatsııasyn emdeý» boıynsha sheberlik sabaǵyn ótkizdi.
Shara barysynda Taraz qalasynda alǵash ret arnaıy angıografııalyq kabınette Taraz qalasynyń 24 jastaǵy turǵynyna ota jasaldy.
Naýqas qalalyq kópbeıindi aýrýhanasyna tserebrovoskýlıarlyq aýrý túrimen aýyr dárejedegi qaıtalanǵan gemorragııalyq ınsýlt, oń jaq mańdaıdaǵy jedel mıishilik gematom, arterıovenozdyq malformatsııa dıagnozymen aýyr halde túsken. Buryn mundaı naýqastar ota jasatý úshin elimizdegi arnaıy klınıkalyq ortalyqtarǵa, shet elge baratyn.
Sheberlik sabaǵynda Jambyl oblysy dárigerlerine otanyń ádis-tásilderi, odan keıingi kútim, em-shara joldary týraly aıtylyp, tájirıbelik ota kórsetildi. Aldaǵy ýaqytta mundaı patsıentterdiń alysqa barmaı, Taraz qalalyq kópbeıindi aýrýhanasynda da emdelýge múmkindigi bar.
«Mundaı aýrýmen aýyratyn naýqastardyń 17-40 paıyzy ustama bolyp, esinen tanyp qulap qalý jaǵdaıyna kóp ushyraıdy. Aıaq-qoly jansyzdanady. Epılepsııa belgisi sezimtaldyqtyń buzylýy, júrek soǵýy, bet álpetimen de kórinýi múmkin. Sondyqtan, mundaı jaǵdaıda hırýrgııalyq ota jasamasa bolmaıdy. Sátti ótken otadan, naýqas aıyǵyp ketýi ábden múmkin», - deıdi bilikti de tájirıbeli neırohırýrgııa isiniń sheberi Myńjylqy Berdiqojaev.
