Tarazda alǵash ret balaǵa bas súıek jikteriniń erte bitýine baılanysty kúrdeli ota jasaldy

TARAZ. KAZINFORM — Jambyl oblystyq kópbeıindi balalar aýrýhanasynyń neırohırýrgııa bóliminde óńir tarıhynda alǵash ret bas súıek súıekterin jalǵap turatyn jikterdiń merziminen buryn bitýinen týyndaıtyn dert — sınostozdyq plagıotsefalııaǵa baılanysty kúrdeli joǵary tehnologııalyq ota sátti ótti.

Bul — medıtsınalyq plastınalar qoldanylǵan rekonstrýktıvti kranıotomııa.

Naýqas — bir jasar bala. Operatsııa respýblıkalyq mamandandyrylǵan ortalyqtarǵa joldamasyz-aq oblystyq balalar aýrýhanasynyń bazasynda jasalyp, Jambyl óńirindegi balalar neırohırýrgııasynyń damýyna mańyzdy serpin berdi. Buǵan deıin mundaı týa bitken kúrdeli patologııalarǵa hırýrgııalyq kómek tek elimizdiń iri klınıkalarynda ǵana kórsetiletin.

Joǵary tehnologııalyq aralasýdy Jambyl oblystyq kópbeıindi balalar aýrýhanasynyń neırohırýrgy Mırdas Mýradov sátti oryndap, kásibı sheberligi men jaýapkershiliginiń joǵary deńgeıin kórsetti.

Mamannyń aıtýynsha, sınostozdyq plagıotsefalııa — bas súıek jikteriniń erte bitýimen sıpattalatyn sırek týa bitken aqaý. Sonyń saldarynan balanyń bas pishini qısaıyp, mıdyń qalypty ósýi men damýyna keri áser etýi múmkin. Sondyqtan der kezinde jasalǵan hırýrgııalyq em — eń tıimdi ári qajetti tásil.

Hırýrgııalyq aralasý barysynda bas súıek súıekteri tolyq qaıta qalypqa keltirilip, bastyń durys pishini men kóz uıalarynyń ornalasýy zamanaýı medıtsınalyq plastınalardyń kómegimen túzetildi. Qoldanylǵan ádis balanyń mıynyń qalypty damýyna múmkindik berip, medıtsınada qaýipsiz ári nátıjeli tásilderdiń biri sanalady.

Tarazda dál osy dertke qatysty alǵashqy operatsııanyń jasalýy Jambyl oblysynda balalarǵa kórsetiletin joǵary tehnologııalyq neırohırýrgııalyq kómektiń múmkindigin keńeıtip, onyń óńir turǵyndary úshin qoljetimdiligin arttyra tústi.

Aıta ketelik elde 4 506 adam donorlyq aǵza kezeginde tur.