Tarazda alǵash ret Arbat paıda boldy

TARAZ. QazAqparat – Tarazdyń endi óz Arbaty bar. Atalǵan nysan oblystyń seksen jyldyǵyna oraı ashylǵan alyp keshen – «Kóne Tarazdyń» bir bóligi retinde salynǵan, dep habarlaıdy QazAqparat.

«Arbat-2» dep atalatyn jaıaý júrginshiler alańy - turǵyndar úshin tynyǵýǵa arnalǵan taptyrmas oryn. Ol «MART» oıyn-saýyq saýda ortalyǵynan Aqqozıev kóshesine deıingi aralyqty alyp jatyr. Uzyndyǵy - 500 metrge jýyq. Onda bekitilgen aýmaq tegistelip, 2400 sharshy metrge jýyq jaıaý júrginshi joly tóseldi. Burynǵy «Shahrıstan» bazarynyń qorshaýyna demontaj jumysy júrgizildi.

Arbat qurylysyn bas merdiger «Sever-ıÝG Ýnıversal» jaýapkershiligi shekteýli seriktestigi atqarǵan. 2434 sharshy metr aýmaqqa gazon tósenishin tóseý, aǵash otyrǵyzý jáne jaryqtandyrý baǵanalarymen qamtamasyz etý jumystary qarastyrylýda.

Aıta keteıik, buǵan deıin oblys ortalyǵynda mundaı jaıaý júrginshilerge arnalǵan Arbat bolǵan emes. Osy turǵydan alǵanda, bul qala turǵyndary men qonaqtary úshin tamasha tartý bolyp otyr.

Jalpy, «Kóne Taraz» tarıhı-etnomádenı kesheniniń aýmaǵyna 45 myń sharshy metrge órnektas tósenish tóselip, 6 sýburqaq ornatyldy. 67 dana oryndyq, 57 dana qoqys jáshikteri jáne 2 dana besedka qoıylǵan. «Kóne Taraz»-dyń qazba jumystaryn júrgizý barysynda tabylǵan jádigerlerdiń maketteri de atalǵan aýmaqtan oryn alyp, sáýlettik sánin artyryp tur.

Sondaı-aq aldaǵy ýaqytta «Arbat-1», «Arbat-3» jobalary da júzege aspaq. Ol ǵana emes, «MART» saýda ortalyǵynyń artyndaǵy 350 metr kanal boıyna kishi arhıtektýralyq nysandar salynyp, kelýshilerge jaıly jaǵajaı jasalmaq.