Tarazda sport kesheniniń basshysyn bopsalaǵan úsh adam sottaldy

TARAZ. KAZINFORM — Tarazda bloger men onyń sybaılastary sport kesheni týraly jazbany óshirý úshin basshylyqtan 2 mln 500 myń teńge, bir qyzmetkerdi jumystan shyǵaryp, ekinshisin jumysqa qaıta alýdy jáne sportzalǵa eki jyldyq abonement talap etken.

Bloger Abaı Júndibaev (Sokrat) óziniń Facebook paraqshasynda túrli memlekettik organdardy synap, únemi sybaılas jemqorlyq týraly jazbalar jarııalap otyrady. Ótken jyly «Taraz Arena» sport kesheni de blogerdiń nazaryna ilikti. Biraq ol jazbaǵa óz jerlesteriniń nemese joǵary laýazymdy tulǵalardyń resmı jaýabyn kútpesten sport kesheniniń dırektory Janat Babaevty bopsalaý arqyly «aqsha tabýǵa» sheshim qabyldady.

Ol bul iske taǵy eki adamdy tartqan. Olar aqshany alyp, Júndibaevqa qaýipsiz jaǵdaıda tapsyrýy tıis bolǵan. Bloger sport keshenin synaǵan jazbasyn óshirgeni úshin 2,5 mıllıon teńge talap etken. Sondaı-aq, aldaǵy ýaqytta bul aqparattyń taralmaýy úshin bir qyzmetkerdi jumystan shyǵaryp, kerisinshe, basqa bir áıeldi jumysqa alýdy talap etken. Sport kesheniniń dırektory barlyq sharttarmen kelisip, talap etilgen somany tólep, ústeme retinde sport zalǵa eki jyldyq abonement bergen.

Sot otyrysynda bloger óz kinásin tolyq moıyndap, sottan bas bostandyǵynan aıyrýdan basqa jaza taǵaıyndaýdy surady. Onyń sybaılastary kinálaryn moıyndamaı, sottan ózderin aqtaýdy surady.

Mundaı zańbuzýshylyqta Qylmystyq kodekstiń 194-babynyń 2-bóligimen (Qorqytyp alý) jaza retinde múlki tárkilenip, bas bostandyǵyn shekteý nemese 3 jyldan 7 jylǵa deıingi merzimge bas bostandyǵynan aıyrý jazasy qarastyrylǵan. Prokýror aıyptalýshylardy 4 jarym jylǵa bas bostandyǵynan aıyrýdy surady.

Sýdıa bopsalaýǵa qatysýshylardyń úsheýin de kináli dep tapty. Abaı Júndibaevqa úsh jylǵa bas bostandyǵynan aıyrý jazasy taǵaıyndaldy. Sondaı-aq eki sybaılasy da úsh jylǵa bas bostandyǵynan shekteldi.

Eske salaıyq, Aqtóbede aýyl turǵynyn bopsalaǵan úsh kúdikti qamaldy. Kúdiktiler jábirlenýshiden 2 mln teńge talap etken.