Tarazda álem halyqtarynyń bılerine arnalǵan aımaqtyq baıqaý ótti
ASTANA. QazAqparat - Jambyl oblysynda álem halyqtarynyń bılerine arnalǵan «Bı álemi» atty aımaqtyq baıqaý ótti. Taraz memlekettik pedagogıkalyq ınstıtýty uıymdastyrǵan horeografııalyq saıysqa óńir jastary qatysty. Bul jaıynda QazAqparatqa atalǵan oqý ornynyń resmı ókili Jandar Asan málim etti.
«Tuńǵysh ret ótkizilip otyrǵan óner dodasynyń maqsaty ulttar men ulystardyń bılerine degen qyzyǵýshylyq pen qurmetti arttyrý jáne halyqtardyń salt-dástúri men rýhanı mádenıetin nasıhattaý. Sonymen qatar, Jambyl oblysyndaǵy talantty jastardy anyqtaý, olardy bekzat ónerge baýlý arqyly shyǵarmashylyq qarym-qabiletin damytý, estetıkalyq talǵamdaryn qalyptastyrý»,- dedi ol.
Onyń sózine qaraǵanda, saıystyń saltanatty ashylý rásiminde TarMPI rektory Darııa Qojamjarova sharanyń máni men mańyzyna toqtalyp, saıystyń óskeleń urpaqtyń jan-jaqty bolyp ósýine jáne halyqtar dostyǵyn nyǵaıtýǵa qosar súbeli úlesi týrasynda aıtyp bergen.
Baıqaýda Merki, Jýaly, Turar Rysqulov, Talas, Baızaq, Jambyl aýdandary men Taraz qalasynan kelgen jastar qatysty. Óner dodasy eki kezeń boıynsha júrgizildi. Alǵashqy týrda qatysýshylar qazaq halqynyń, ekinshi kezeńde ózge ulttyń bılerin oryndap, ózara synǵa tústi.
Saıysqa belgili óner maıtalmandary ádilqazylyq jasady. Konkýrs barysynda qatysýshylar oryndaýshylyq sheberligi, sahnalyq beıneni somdaýy, kompozıtsııalyq sheshimi, mýzykalyq súıemeldeýdiń utymdy tańdalýy, ártistik qabileti jáne syrtqy pishinniń bı mánerine sáıkes kelýi syndy talaptar boıynsha baǵalandy.
«Bul joba jastarǵa úlken múmkindik syılaıdy. Olar óz boıyndaǵy ónerin ǵana kórsetip qoımaıdy, sondaı-aq joǵary oqý orynynyń maman horeograftarymen de jumys istep, dáris alady. Bul keleshekte olardyń kásibı bıshi retinde shyńdala túsýine sep bolmaq», deıdi qazylar alqasynyń músheleri.
Baıqaý qorytyndysy boıynsha Ksenııa Rýdakova «júzden júırik, myńnan tulpar shyǵyp», bas júldege ıe boldy. Oǵan ınstıtýt rektory Darııa Qojamjarova taǵaıyndaǵan TarMPI-da «Horeografııa» mamandyǵy boıynsha bilim alýǵa 100 paıyzdyq jeńildik beriletini týraly sertıfıkat tabystaldy. Al, 1-oryn ıegeri Tatıana Dýma 75 paıyzdyq, 2-oryn ıegeri Adııa Bekmýrzaeva 50 paıyzdyq jáne 3-oryn ıegeri Merýert Abıkýl 30 paıyzdyq oqý jeńildigine qol jetkizdi. Sondaı-aq, qatysýshylardy baıqaýǵa daıyndaǵan ustazdary «Úzdik baletmeısterlik jumys», «Horeografııalyq shyǵarmashylyq jáne biregeı ıdeıalar» atalymdary boıynsha arnaıy dıplomdarmen marapattaldy.
