Tarazda álem chempıony Fırýza Sharıpovaǵa páter kilti tabystaldy
ASTANA. QazAqparat - Búgin Jambyl oblysynyń ákimi Kárim Kókirekbaev WIBA jáne WBU tujyrymdary boıynsha álem chempıony atanǵan Qazaqstannyń áıelder arasyndaǵy birinshi kásibı boksshysy Fırýza Sharıpovany qabyldady. Bul týraly Jambyl oblysy ákimdigine silteme jasap «QazAqparat» HAA tilshisi habarlaıdy.
Aımaq basshysy boksshyny kezekti jeńisimen quttyqtap, denine saýlyq, kásibı rıngte jańa jeńisterge jete berýine tilektestik bildirdi.
«Sáttilik árkez serigińiz bolsyn. Biz Sizdiń jetistikterińizben maqtanamyz», - degen Kárim Kókirekbaev sportshyǵa Taraz qalasynan eki bólmeli páterdiń kiltin tabystady.
Oblys basshysy óskeleń urpaq arasynda patrıottyq rýh qalyptastyrý maqsatynda tárbıelik jumystar atqaryp kele jatqan basqa da jetistikke jetken jambyldyq sportshylardyń, chempıondar men jattyqtyrýshylardyń eńbegin atap ótti.
Jambyl oblysynda 20 myńnan astam sportshy jattyǵatyn eki myńnan astam sport nysandary bar.
Fırýza Sharıpova aımaq basshysynyń jyly qabyldaýyna alǵysyn bildirip, jankúıerlerin jańa jeńisterimen qýanta beretindigine sendirdi.
«Meniń jeńisim - meni osy jekpe-jekke daıyndaǵan barlyq komanda músheleriniń eńbeginiń jemisi. Aldaǵy ýaqytta qarasha-jeltoqsan aılarynda taǵy da rıngke shyǵýdy josparlap otyrmyn», - dedi sportshy.
