Tarazda áldekimder bıyl jańartylǵan keńes jaýyngerleriniń memorıalyn búldirip ketti

ASTANA. KAZINFORM — Tarazdyń Qarasý shaǵynaýdanyndaǵy zırat aýmaǵynda ornalasqan memorıalǵa zaqym keltirgen adamdar izdestirilip jatyr. Bıyl qaıta jańǵyrtylǵan eskertkishti qaıta qalpyna keltirý qajet.

Tarazda áldekimder bıyl jańartylǵan keńes jaýyngerleriniń memorıalyn búldirip ketti
Foto: Jambyl oblystyq polıtsııa departamenti

Taraz ákimdiginiń málimetinshe, beıtanys adamdar keńes jaýyngerlerine arnalǵan memorıaldy búldirgen. Bıyl qala ákimdigi men Reseı Federatsııasynyń Almatydaǵy Bas konsýldyǵy birlesip, eskertkish aýmaǵyn tolyq abattandyryp, qaıta jańǵyrtqan edi.

Oqıǵadan keıin quqyq qorǵaý organdaryna aryz joldandy. Jambyl oblysynyń polıtsııa departamenti osy derek boıynsha tergeý bastalǵanyn rastady.

— Atalǵan derek boıynsha eskertkishti qorlaý faktisimen qylmystyq is qozǵaldy. Qazir quqyq buzýshylardy anyqtap, ustaýǵa baǵyttalǵan jedel-izdestirý sharalary júrgizilip jatyr, — dep habarlady vedomstvo.

Qazirgi ýaqytta eskertkishti búldirgenderdiń ustalǵany nemese kúdiktilerdiń anyqtalǵany týraly aqparat joq.

Qala ákimdigi eskertkishtiń jaqyn arada tolyq qalpyna keltiriletinin málimdedi. 

Eske salaıyq, buǵan deıin jyl basynan beri Jambyl oblysynda 82 vandalızm dereginiń joly kesilgenin jazǵan edik.

Sondaı-aq Premer-mınıstr Oljas Bektenov Іshki ister mınıstrligine tabıǵı eskertkishterdiń qorǵalýyn baqylaýdy kúsheıtýdi tapsyrǵanyn habarlaǵanbyz.