Tarazda «Ál-Farabı men Abaıǵa arnalǵan ǵylymı konferentsııa ótti
Atalǵan konferentsııaǵa qatysýshylar tulǵalardyń rýhanı muralaryn zertteýdiń mańyzdylyǵyn alǵa tartyp, oramdy oılaryn ortaǵa saldy.
«Búgingi konferentsııa uly ustaz ál-Farabıdiń 1150 jyldyǵyna jáne oıshyl aqyn Abaı Qunanbaevtyń 175 jyldyǵyna arnalǵan. Olardyń murasy – máńgilik. Ol arqyly kóptegen jas býyn rýhanı tolysýda. Ál-Farabı men Abaı – urpaqtar sabaqtastyǵynyń jarqyn úlgisi. Biz bul ıgi dástúrdi odan ári úzip almaýymyz kerek», - dedi Jambyl oblysynyń ákimi Berdibek Saparbaev.
Qazaqstan Jazýshylar odaǵynyń tóraǵasy, Qazaqstan Respýblıkasynyń eńbek sińirgen qaıratkeri, aqyn Ulyqbek Esdáýlet mundaı konferentsııalardyń uly oıshylardyń ıdeıalaryn, tarıh taǵylymyn tereńirek tanı túsýge, ótkenniń qatelikterin bolashaqta qaıtalamaýǵa septigin tıgizetinin atap ótti.
«Ál-Farabı de, Abaı da óz zamanynyń rýhanııatynyń kórnekti ókilderi boldy. Olardyń eńbekteri áli kúnge ózektiligin joıǵan joq. Olar bizge búkil memlekettiń órkendeýi men tabysy halyqtyń rýhanı damýyna tikeleı baılanysty ekenin jetkizýge tyrysty», - deıdi ál-Farabı atyndaǵy QazUÝ rektory, akademık Ǵalymqaıyr Mutanov.
«Egemen Qazaqstan» respýblıkalyq gazeti» AQ Basqarma tóraǵasy Darhan Qydyráli konferentsııaǵa onlaın rejıminde qatysty.
«Ál-Farabı men Abaıdyń ózara uqsastyǵy kóp. Olar bilim men ǵylymnyń progrestiń negizi ekendigin alǵa tartty», - dedi ol.
L. N. Gýmılev atyndaǵy EUÝ rektory Erlan Sydyqov ta rýhanı qundylyqtardy nasıhattaýdyń mańyzdylyǵyn tilge tıek etti. Ol Abaı shyǵarmalarynyń tálimin túısingen halqymyz birligin, kelisim men yntymaqtastyǵyn joǵaltpaıtyndyǵyna senim bildirdi.
«Abaı: «Birińdi qazaq, biriń dos, qórmeseń istiń bári bos», - dep birlikke úndeıdi. Prezıdent Qasym-Jomart Toqaev aıtqandaı, biz uly aǵartýshyny jańa Qazaqstannyń brendi etip, ony búkil álemge tanytýymyz kerek», - dedi Erlan Sydyqov.
Konferentsııa barysynda ál-Farabı men Abaıdyń ıdeıalaryn nasıhattaý, olardyń ómirlik tájirıbesin zertteý maqsatynda is-sharalar ótkizýge qatysty túrli usynystar aıtyldy.
«Bul bizge memlekettigimizdi nyǵaıtýǵa, bilim berý júıesin damytýǵa kómektesedi. Ol úshin jańa jaǵymdy qasıetterdi qalyptastyrý, kertartpa daǵdylardan arylý qajet. Abaı ádiletti qoǵam qurýdy armandady jáne adamdyq qasıetterden alystamaýǵa meńzedi», - dedi Abaı atyndaǵy QazUPÝ rektory Tahır Balyqbaev.
Abaıtanýshy, M.H.Dýlatı atyndaǵy TarÓÝ oqytýshysy Rahat Salamatova uly aǵartýshylardyń shyǵarmalary arqyly qazaq mádenıetiniń jetistikterin nasıhattaýǵa bolatyndyǵyna nazar aýdartty.
Ál-Farabı men Abaıdyń kóptegen shyǵarmalary áli kúnge deıin kúrdeli kúıinde qalyp otyr. Olardy keńinen zertteýdi jalǵastyrý qajet. Tulǵalardyń fılosofııasynyń negizi bilim men eńbekqorlyqqa degen umtyldyrý bolyp tabylady.
Sonymen qatar, konferentsııa barysynda aımaq basshysy Berdibek Saparbaev pen ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov JOO men oblys ákimdigi arasyndaǵy ózara yntymaqtastyq týraly memorandýmǵa qol qoıdy.
Taraptar túrli salalar boıynsha bilikti kadrlar daıarlaý, ekonomıkalyq damý, óndiris máseleleri boıynsha yntymaqtastyqty júzege asyrýǵa nıetti.
«Ál-Farabı atyndaǵy QazUÝ - Qazaqstannyń kóptegen kórnekti ǵalymdarynyń oshaǵy, talanttardyń besigi. Bizdiń ózara yntymaqtastyq tıimdiligi men búkil Qazaqstanǵa kóp paıda ákeletinine senimdimin», - dedi Berdibek Saparbaev.
Ǵalymqaıyr Mutanov ta óz kezeginde jyly qabyldaǵan oblys ákimine alǵysyn bildirip, ýnıversıtettiń jemisti yntymaqtastyqqa daıyn ekendigine sendirdi.
