Tarazda «Aqsaı» bazary órtendi: qylmystyq is qozǵaldy
Taraz qalasynyń ákimi Baqytjan Orynbekov, qala prokýrory Jambyl Smatov, Taraz qalalyq tótenshe jaǵdaılar bóliminiń basshysy Ásker Sarbatov, Taraz qalalyq ishki ister bóliminiń basshysy Ardaq Mádimarov zardap shekken kásipkerlermen kezdesti.
«Oqıǵaǵa baılanysty QR Qylmystyq kodeksiniń 292-baby «Órt qaýipsizdigi talaptaryn buzý» boıynsha qylmystyq is qozǵaldy. Oqıǵanyń aldyn ala sebebin anyqtaý úshin eki jedel-tergeý toby qurylyp, órt-tehnıkalyq saraptamasy taǵaıyndaldy», - dedi qalalyq polıtsııa bóliminiń bastyǵy Ardaq Mádimarov.
Taraz qalasynyń prokýrory Jambyl Smatov mundaı jaǵdaıdaǵy basty máselelerdiń biri shyǵyn men onyń kólemi ekenin atap ótti.
«Osyǵan oraı, kásipkerler qurylǵan tergeý tobynyń qyzmetkerlerine óz bıznesine, ıaǵnı qujattamaǵa, kelisim-sharttarǵa, taýardyń kólemi men jalpy sanyna qatysty aqparat berýi kerek. Nátıjesinde shyǵyn kólemi tolyq esepteletin bolady», - dedi qala prokýrory.
Ákimdik qyzmetkerleri men kásipkerlerdiń arasynan basqa kásipkerlerdi jedel-izdestirý sharalarynyń barysy men talap etiletin áreketter týraly jedel habardar etetin bastamashy top quryldy.
Habarlanǵandaı, Tarazda juma kúni «Aqsaı» bazaryndaǵy jeke eki qabatty kommertsııalyq ǵımarattyń shatyry órtendi. Kórsetilgen órt aýmaǵy 1050 sharshy metrdi quraıdy. Órt saldarynan 25 jastaǵy azamattyq qorǵaý serjanty, sondaı-aq dárigerler júıke aýrýy degen dıagnoz qoıǵan 39 jáne 55 jastaǵy eki áıel zardap shekti.
Saýda ortalyǵy ǵımaraty men 44 dúńgirshektiń shatyryn sharpyǵan órtti sóndirýge jambyldyq qutqarýshylar bir saǵattan astam ýaqyt jumsady. Tótenshe jaǵdaılar departamentiniń 64 qyzmetkeri men 17 tehnıka jumyldyrylǵan.
Foto Taraz qalasy ákimdiginiń baspasóz qyzmeti