Tarazda 86 jastaǵy qarııa koronavırýsqa shaldyqqan
TARAZ. QazAqparat – 6 sáýir kúni Jambyl oblysynda koronavırýs ınfektsııanyń bes oqıǵasy anyqtaldy, dep habarlaıdy QazAqparat oblys ákiminiń baspasóz qyzmetine silteme jasap.
Aýyrǵandardyń biri - 1999 jyly týǵan Shymkent qalasynyń turǵyny. Azamatsha 3 sáýirde Delı-Taraz reısimen kelgen.
Atalǵan reıstiń barlyq jolaýshylary ushý jolaǵynan birden arnaıy avtobýstarǵa otyrǵyzylyp, medıtsınalyq jáne polıtsııa qyzmetkerleriniń ilesip júrýimen karantındik statsıonarǵa jatqyzyldy. Medıtsınalyq mekemede olardan 14 kún boıy taldaý alynady.
Sondaı-aq, Taraz qalasynyń 59 jastaǵy turǵynynan ınfektsııaǵa alynǵan taldaý oń nátıje kórsetti. Ol buǵan deıin aýyrǵan naýqaspen baılanysta bolǵan. Onymen qarym-qatynasta bolǵan 24 adam anyqtalyp, karantınge jatqyzyldy.
Úshinshi naýqas - oblys ortalyǵynyń 86 jastaǵy turǵyny. Epıdemıologııalyq tekserý barysynda onyń 17 naýryz kúni Almatydan kelgen jaqyn týysymen baılanysta bolǵany belgili boldy. Naýqaspen qarym-qatynasta bolǵan 5 tulǵa anyqtalyp, karantınge jatqyzyldy.
Sondaı-aq, Merki aýdanynyń 1990 jáne 1998 jyly týǵan eki turǵynynyń taldaý qorytyndalary oń nátıje kórsetken. Olarmen baılanysta bolǵan 17 tulǵa karantındik statsıonarǵa ornalastyrylyp, oqshaýlandy.
Búginde baılanysta bolǵan adamdardy anyqtaý, olardy karantındik statsıonarǵa ornalastyrý, zerthanalyq zertteý úshin taldaýlar alý boıynsha jumystar júrgizilýde. Sanıtarlyq-epıdemııalyq qyzmetter olardyń turǵylyqty jáne barǵan jerleri boıynsha dezınfektsııalyq óńdeý sharalaryn júrgizdi.
Qazirgi tańda jalpy oblys boıynsha koronavırýstyń 40 jaǵdaıy tirkelgen.Onyń ishinde 11 adam shekaralyq ótkizý pýnktterin kesip ótý kezinde, 6 jolaýshy Delı reısinen anyqtalǵan. Tarazda - 5 oqıǵa, Qordaı aýdanynda – 14, Merki aýdanynda – 2, Shý jáne Jambyl aýdanynda bir-birden tirkelgen.
