Tarazda 80 polıtsııa kóligi birigip «Úıde bol» degen jazý qurastyrdy
TARAZ. QazAqparat – Túngi Tarazdyń bas kósheleriniń birinde 80-ge jýyq patrýldik kóliktiń qatysýymen quralǵan «Úıde bol» degen jazý paıda boldy, - dep habarlaıdy QazAqparat.
Tótenshe jaǵdaı kezinde koronavırýstyq ınfektsııaǵa baılanysty engizilgen sharalardyń kúsheıýine qaramastan, oblystyń keıbir turǵyndary karantın rejıminiń talaptaryn jete saqtamaýda. Sebepsiz úıden shyǵatyndardyń qarasy azaımaı otyr.
Statıstıkaǵa súıensek, tótenshe jaǵdaı kezinde oblys boıynsha 700-den astam zańbuzýshylyq anyqtalǵan. Karantın kezinde polıtseıler táýlik boıy qyzmet atqaryp, óńir turǵyndaryn úıde bolýǵa barynsha shaqyryp, ol boıynsha túrli nazar aýdararlyq sharalar uıymdastyrýda.
Keshe tártip saqshylary turǵyndardy karantın rejımin saqtaýǵa erekshe tásilmen shaqyrdy. Seksen qyzmettik kólikpen shahardyń basty kósheleriniń birinde «Úıde bol» degen jazýdy qurastyryp, turǵyndarǵa úıde bolýdyń mańyzdylyǵyn túsindirip, beınerolık túsirdi. Benorolık arqyly oblystyq polıtsııa departamentiniń basshysy Janat Súleımenov turǵyndardy bekitilgen talaptardy oryndaýǵa shaqyrdy.
– Barlyq is-sharalar sizderdiń qaýipsizdikterińiz úshin jáne densaýlyqtaryńyzdy qorǵaýǵa baǵyttalýda. Karantındik rejımniń tezirek aıaqtalýy sizderdiń talapty barynsha saqtaýlaryńyzǵa baılanysty, - deıdi oblystyq polıtsııa departamentiniń basshysy Janat Súleımenov.
