Tarazda 80 otbasy jańa páterge ıe boldy
TARAZ. QazAqparat - Taraz qalasynyń turǵyn úı qory búgin «Qarasý» turǵyn alabyndaǵy 80 jańa pátermen tolyqty, dep habarlaıdy «QazAqparat» HAA tilshisi.
Oblys ákiminiń orynbasary Ǵalymjan Ábdiraıymov jańa páter ıelerin Qazaqstan Respýblıkasynyń Táýelsizdigi kúnimen quttyqtap, «Nurly jer» baǵdarlamasymen turǵyzylǵan jańa páterlerdiń kiltin tabystady.
«Jambyl oblysynda táýelsizdik alǵan 25 jylda 4,9 mln sharshy metr turǵyn úı paıdalanýǵa berildi. Shamamen 800 myń jambyldyq páter aldy. Memlekettik baǵdarlamanyń maqsaty turǵyndar úshin turǵyn úı baǵasyn qoljetimdi etý.
Atap aıtsaq, «Nurly jol» ınfraqurylymdy damytýdyń memlekettik baǵdarlamasy aıasynda Taraz qalasynyń «Araı» shaǵyn aýdanynda 2015-2017 jyldary jalpy somasy 8,57 mlrd teńgeni quraıtyn 15 úı paıdalanýǵa berildi. Bıylǵy jyly biz qurylys boıynsha 319,6 myń sharshy metr turǵyn úı josparyn tolyqtaı oryndadyq», - dedi oblys ákiminiń orynbasary.
Ǵalymjan Raıylulynyń aıtýynsha, baǵdarlama aıasynda 2017 jylǵa Respýblıqalyq bıýdjetten 1,56 mlrd.teńge bólinip, aýdany 17,7 myń sharshy metr nemese 258 páterli 4 úıdiń qurylysy bastalǵan, onyń 11,9 sharshy metri nemese 178 páterli 3 úı ústimizdegi jyly paıdalanýǵa berilýde, sonyń qatarynda, búgin ózderińiz ıe bolatyn Qarasý móltek aýdanyndaǵy 80 páterli úı.
Jambyl oblysy ákimdigi baspasóz qyzmetiniń málemdeýinshe, «Qarasý» turǵyn alqabyndaǵy úılerdiń qurylysy bıylǵy jyldyń shilde aıynda bastalǵan. Turǵyn úıdiń jalpy kólemi 4205,6 sharshy metrdi quraıdy. 80 páterli úıde 20 úsh bólmeli, 40 eki bólmeli jáne 20 bir bólmeli páter bar. Jambyl oblysy ákimdiginiń ekonomıka jáne bıýdjettik josparlaý basqarmasynyń basshysy Gúldana Jaýynbekovanyń aıtýynsha, bıylǵy jyly Taraz qalasynda «Nurly jer» baǵdarlamasy aıasynda 18 jobany júzege asyrýǵa 7,4 mlrd teńge qarastyrylǵan, sonymen qatar, QR Ulttyq qorynan - 3,1 mlrd teńge, respýblıkalyq bıýdjetten - 4,3 mlrd teńge bólinýge tıis.
Aıta keterligi, «Qarasý» shaǵyn aýdanynda 80 páterli turǵyn úıdiń qurylysy aǵymdaǵy jyldyń shilde aıynda bastalǵan bolatyn. Páterlerdiń jakpy alańy 4205,6 m2 qurasa, tenderlik quny 585,401 mln.tengeni quraıdy.
