Tarazda 80 otbasy jańa baspanaǵa ıe boldy
Búgin Jambyl oblysynyń ákimi Kárim Kókirekbaev Taraz qalasyndaǵy «Araı-2» jańa turǵyn úı alabynda «Nurly jer» turǵyn úı ınfraqurylymyn damytý memlekettik baǵdarlamasy boıynsha salynǵan 80 páterdiń kiltin az qamtylǵan, kóp balaly otbasylarǵa jáne múmkindigi shekteýli jandarǵa tabys etti.
«Bıyl elimizdiń Táýelsizdik alǵanyna 26 jyl tolyp otyr, - dedi óńir basshysy. - Qysqa ýaqyt ishinde memleketimiz úlken jetistikterge qol jetkizip, búkil álemge ózin jas órkenıetti el retinde moıyndata bildi. Bizde bolyp jatqan oń ózgeristerdiń barlyǵy Prezıdentimizdiń sarabdal saıasatymen tyǵyz baılanysty. Búgin «Araı-2» turǵyn úı alabyndaǵy 80 páter berilip jatyr. Qoǵamdastyqtyń atynan «Agrospetsstroı» JShS-ǵa júrgizilgen sapaly qurylys jumystary úshin alǵys aıtamyn».
Sondaı-aq, K.Kókirekbaev 2017 jyly óńirde jyldyń basynda josparlanǵan 319,6 myń sharshy metr turǵyn úıdiń qurylys boıynsha jospary tolyǵymen oryndalǵanyn atap ótti.
«Araı» turǵyn úı alabynyń ózinde «Nurly jol» baǵdarlamasy aıasynda úsh jyldyń ishinde jalpy aýmaǵy 85,5 sharshy metr bolatyn somasy 8,5 mlrd teńgege 15 kóp páterli úı turǵyzylǵan.
«Agrospetsstroı» JShS basshysy Erjan Kósherbaev atap ótkendeı, kompanııa 80 páterlik eki jańa kóp páterli turǵyn úı salyp jatyr. Sonyń biri, Táýelsizdik kúnine tartý retinde paıdalanýǵa berildi. Ekinshi turǵyn úıdiń qurylysy kelesi jyly aıaqtalady.
«Nysannyń qurylysy 2016 jyldyń jeltoqsan aıynda bastaldy. Birinshi aýmaǵy 4741 sharshy metr bolatyn 80 páterli úıdi ýaqytynan buryn paıdalanýǵa berip otyrmyz. Úıde 3 bólmeli 35 páter, 2 bólmeli 30 páter jáne bir bólmeli 15 páter bar», - dedi ol.
Jambyl oblysy ákimdiginiń baspasóz qyzmeti túsindirip bergendeı, áleýmettik turǵyn úı nysanynyń tenderlik quny 643,2 mıllıon teńgeni quraıdy. Tarazda barlyǵy 1 235 kóp páterli turǵyn úı bar. Táýelsizdik alǵan jyldary oblys ortalyǵynda jańa turǵyn úı alabtary men «Astana», «Baıterek» shaǵyn aýdandary paıda boldy. Qazir 14 jáne 15 shaǵyn aýdandardyń qurylysy kezekte tur.
