Tarazda 7500-ge jýyq otbasy «Birgemiz» qorynan 50 myń teńgeden aldy

TARAZ. QazAqparat – Taraz qalasynda 7500-ge jýyq turǵyn «Birgemiz» qoǵamdyq qorynan 50 myń teńgeden kómek aldy, dep habarlaıdy QazAqparat.

Málim etilgendeı, «Birgemiz» qoǵamdyq qory arqyly el boıynsha 23 qalanyń 150 myńnan astam turǵynyna 50 myń teńgeden beriledi. Ony «Nur Otan» partııasy jáne jergilikti ákimdikter úlestiredi. 23 qalanyń qataryna Jambyl oblysynan tek Taraz qalasy ǵana engen. Qordan járdemqarjy alýshylar jeti sanatqa jiktep bólingen. Ol týraly «Nur Otan» partııasy Jambyl oblystyq fılıalynyń baspasóz hatshysy Danııar Álimqul habarlady.

«2020 jyldyń 2 sáýiri kúni respýblıkalyq «Bizbirgemiz» qorynan «BIRGEMIZ – JAMBYL OBLYSY» qorynyń esep shotyna 373,6 mıllıon teńge qarajat tústi. Ol qarajat Tarazdan tańdalǵan 7473 adamǵa 50 myń teńgeden aýdaryldy. Bul – bıznes ókilderi, jomart jandar, el janashyrlarymen jınaqtalǵan demeýshilik kómek», - dedi D.Álimqul.

Sondaı-aq, ol qordyń árbir aýdarylǵan aqshasy men jınalǵan qarjysy boıynsha esep berilip jatqandyǵyn jetkizdi.

«Qarbalasqa qaramaı, qysqa ǵana ýaqytta: oblys, qala ákimdikteriniń áleýmettik salaǵa jaýapty ókilderi, «Nur Otan» partııasynyń ujymy, «Birgemiz-Jambyl oblysy» qory men bank ókilderi birneshe kún boıy demalyssyz jumys istep, qarjynyń turǵyndarǵa jetýine baryn saldy. Bank kartochkalary múlde joqtaryna ol da ázirlenip, keıbir turǵyndardyń esepshottary buǵattan bosatyldy. «BIRGEMIZ – JAMBYL OBLYSY» Qory Taraz qalasynyń arnaıy sanattaǵy turǵyndaryna tıisti kómektiń der kezinde kórsetilýine kúsh saldy»,- dedi partııa fılıalynyń baspasóz hatshysy.