Tarazda 58 jastaǵy qala turǵynyn uryp, tonaǵan jas jigit ustaldy
TARAZ. QazAqparat – Jambyl oblysynyń polıtsııa qyzmetkerleri Taraz qalasynyń 10-shaǵyn aýdanyndaǵy beınebaqylaý kamerasy arqyly qatygezdikpen kisi tonaǵan 23 jastaǵy kúdiktini anyqtap, ustady, dep habarlaıdy QazAqparat tilshisi.
Aıta keteıik, buǵan deıin Taraz qalasyndaǵy Asa shaǵynaýdanyndaǵy úıdiń kireberisinde 58 jastaǵy turǵynǵa jasalǵan qatygez shabýyl beınebaqylaý kamerasyna túsip qalǵan bolatyn.
«Qatty mas bolǵan jábirlenýshiniń dármensiz kúıine qaramastan, qaskúnem ony aıaýsyz uryp-soǵyp, tonaǵan. Tonaýshy uıaly telefon jáne 10 000 teńge somasyndaǵy aqshany ıemdengen. Atalǵan derekke qatysty QR QK 191-babynyń 2-bóligi boıynsha sotqa deıingi tergeý bastaldy» delingen oblystyq polıtsııa departamenti baspasóz qyzmetiniń habarlamasynda.
Polıtsııa qyzmetkerleri kúdiktini quryqtady. Kúdikti kinásin moıyndady.
Ustalǵan azamat buzaqylyq jasaǵany úshin buryn sotty bolǵan.
Qazirgi ýaqytta ol Taraz qalasyndaǵy ýaqytsha ızolıatorǵa qamaldy.
