Tarazda 54 jastaǵy áıeldi pıtbýl talap óltirdi
TARAZ. QazAqparat – Tarazda tóbet ıt talap tastaǵan 54 jastaǵy áıel aýrýhanada kóz jumdy, dep habarlaıdy QazAqparat tilshisi.
Amerıkalyq qaýipti ańshylyq ıt tuqymyna jatatyn pıtbýl talap tastaǵan áıel aýyr halde aýrhanaǵa jetkizilgen. Biraq dárigerler ony ajaldan arashalap qala almady. Oqıǵa búgin keshki saǵat bester shamasynda 2-burylys, Sýhambaev kóshesi, 10-úıdiń aýlasynda bolǵan. Kópshilikten kómek surap jan ushyra aıǵaılaǵan áıeldiń daýysyn kórshiler estip, kómekke jetken. Aýyldastary adamnan ıtti aıyryp alýǵa asyqqanymen, alyp tóbetke álderi kelmegen.
Itke talanǵan áıel týǵan ápkesine qonaqqa kelgen. Kórshileriniń sózinshe, ol jıi kelip turǵan. Biraq bul joly ápkesi sińlisin yzaqor ıtinen qutqaryp qala almaǵan. Oqıǵa ornyna jetken tártip saqshylary da ıtti atyp óltirip qana arasha túsken.
«Kózdep attym, sodan keıin ol jaraqattanyp, úıge kirip ketti. Qaıtadan shabýyl jasaǵandyqtan, taǵy da tabeldi qarýdy qoldanyp, ıtti óltirýge májbúr boldyq. Jalpy qarý 6 ret atyldy. Qazirgi tańda ıt ıesin jaýapkershilikke tartý úshin qylmystyq is qozǵaldy», - deıdi Taraz qalasy polıtsııa bóliminiń 17-shi tirek pýnktiniń ýchaskelik polıtseıi Dinmuhammed Satybaldy.
Dárigerlerdiń aıtýynsha, aýyr jaraqat alǵan azamatsha dereý jansaqtaý bólimine jatqyzylǵan. Tabıǵatynan qanqumar ıt tuqymyna jatatyn pıtbýl 54 jastaǵy áıeldi belden tómen julmalap tastaǵan. 2 lıtr qan joǵaltqan naýqas aýrýhanada jan tapsyrdy.
«Naýqas otadan keıin 4 saǵattan soń kóz jumdy. Ol qatty qan joǵaltqandyqtan gemorragııalyq shok alǵan. Bul degenimiz aýyr travmatıkalyq jaraqat pen qan joǵaltýdan shoshynǵan qos birdeı shokqa jatady. Qazir patologııalyq-anatomııalyq zertteý júrgizý úshin marqumnyń denesi sot saraptamasyna jiberildi», - deıdi oblystyq aýrýhana hırýrgııa bóliminiń meńgerýshisi Jandos Rysqulov.
Oqıǵaǵa kýá bolǵan kórshilerdiń sózinshe, ańshylyq ıttiń ıesi tóbetti 4 jyl buryn asyrap alǵan. Qabaǵan ıt únemi qamaýda bolǵan.
