Tarazda 460 páterli 6 turǵyn úı paıdalanýǵa berildi

TARAZ. QazAqparat - Taraz qalasyndaǵy «Uly dala» shaǵyn aýdanynda 460 páterli 6 kópqabatty turǵyn úı paıdalanýǵa berildi, dep habarlaıdy QazAqparat tilshisi.

Saltanatty sharaǵa oblystyq máslıhat tóraǵasy Abdaly Nuralıev, Taraz qalasynyń ákimi Baqytjan Orynbekov, ardagerler keńesiniń músheleri men zııaly qaýym ókilderi qatysty.

Baqytjan Orynbekov izgi lebizin jetkizip, bul baǵytta atqarylyp jatqan jumystarǵa qysqasha toqtalyp ótti.

«Sońǵy on jylda Taraz qalasynda jańa yqsham aýdandar boı kóterip, turǵyn úı sany arta tústi. Jalpy, sońǵy 4 jyl kóleminde Taraz qalasy boıynsha 5 800 páter berilse, memlekettik baǵdarlamalar arqyly 3 844 azamat baspanaly boldy. Al páter kezeginde turǵan 1 956 azamat baspanaǵa qol jetkizdi. Sondaı-aq, bıyl qala aýmaǵynda 42 turǵyn úıdiń qurylysy júrýde. Jyl qorytyndysymen 2 820 páterli turǵyn úıdi paıdalanýǵa berý josparlanyp otyr. Bul úrdis aldaǵy ýaqytta da jalǵasyn tabady», – degen qala ákimi «Baqytty otbasy» baǵdarlamasy arqyly baspanaǵa alǵan birqatar qonys toı ıelerine páter kiltterin tabystady.

Jalpy 2019-2022 jyldar aralyǵynda oblysta «Baqytty otbasy» baǵdarlamasy boıynsha 1 154 otbasy jańa baspanaǵa ıe bolǵan. Sonymen qatar, bıyl jyl sońyna deıin jańa tujyrymdama boıynsha 1 040 páterge 16 nysandy iske asyrý josparlanýda.
Buǵan deıin «Qazaqstan barysy» Ǵalymjan Qyryqbaıǵa Tarazdan 2 bólmeli páter berilgenin jazǵan bolatynbyz.