Tarazda 456 nysan «Ashyq» qosymshasymen jumys isteıdi
Bul týraly Taraz qalasy ákiminiń orynbasary Almas Sádýbaev aıtty. Onyń sózine qaraǵanda, jyl basynan beri munda qaýipti indet pen pnevmanııaǵa shaldyqqan 6 730 naýqas tirkelgen. Ótken táýliktiń ózinde 186 turǵyn koronavırýsqa shaldyqqan. Al byltyr 2 260 adam
vırýs juqtyrsa, 250 turǵynnan ókpe derti anyqtalǵan.
Shilde aıynyń ózinde Taraz qalasynda 1 814 azamat syrqattansa, 265 adam pnevmanııamen aýyrǵan. Sondyqtan da Taraz qalasy ákimdigi tarapynan qurylǵan monıtorıngtik top oblys ortalyǵynda ornalasqan kásipkerlik sýbektilerine kúndelikti reıdtik jumystar júrgizip, jiti tekserýde.
A. Sádýbaev sońǵy úsh kúnde júrgizilgen osyndaı reıdtik sharalar barysynda 42 hattama toltyrylǵanyn málimdedi. Karantındik shekteý sharalary bastalǵaly beri 468 ákimshilik quqyq buzýshylyq oryn alyp, bıznes ókilderi men jekelegen azamattarǵa 90 120 000 teńgeniń shamasynda aıyppul salynǵan. Ótken jyly barlyǵy 188 nysanǵa qatysty hattama toltyrylyp, olarǵa 41 895 240 teńge somasynda aıyppul ilingen. Onyń ishinde 17 kompıýter klýby, 151 tamaqtaný orny, 20 turǵyn bar.
«Bıyldyqqa monıtorıngtik top ókilderi 280 ákimshilik quqyq buzýshylyq týraly hattamanyń toltyrylýyna yqpal etip, 48 224 700 teńge kóleminde aıyppul salyndy. Munyń 3-ýi zańdy tulǵaǵa, 101-i jeke kásipkerlerge, 176-sy jeke tulǵalarǵa qatysty oryn aldy.
Aýdanaralyq ekonomıkalyq sot 21 talap-aryz materıaldarynyń negizinde isterdi qarasa, 15 nysanǵa qatysty sheshim shyqty. 4 is-qujat qaraýsyz qaldyryldy, 2-ýin qaraý toqtatyldy. Alaıda, sottyń ǵımaratty jabý týraly sheshimi bolmaǵandyqtan, kásipkerler basqa tulǵanyń atynan qaıtadan ashyp, jumystaryn jalǵastyryp jatyr»,- dedi qala ákiminiń orynbasary.
A. Sádýbaev Taraz qalasynda 456 nysannyń «Ashyq» qosymshasymen jumys isteý úshin QR-kod alǵanyn jetkizdi. Olardyń qatarynda kınoteatrlar, qoǵamdyq tamaqtaný oryndary, fıtnes klýbtar, bılıard, kompıýterlik, SPA ortalyqtary, sulýlyq salondary bar. Búginge deıin dámhanaǵa barǵan, atalǵan qosymshada «qyzyl» tús kórsetip, PTR-testi oń nátıjemen shyqqan 42 azamat anyqtalypty. Al «sary» tústi, ıaǵnı naýqas adammen baılanysta bolǵan 68 adam tirkelgen. Olar úı karantınine alynǵan tulǵalar bolyp sanalady, demek ózin-ózi oqshaýlaý rejımin buzǵan.
«Bul azamattar dámhanaǵa kirgizilgen joq. Tıisinshe, jergilikti emhanalarǵa habarlama jiberildi. Karantındik rejımdi buzǵany úshin 4 ákimshilik quqyqbuzýshylyq týraly hattama toltyryldy. Bir kámelettik jasqa tolmaǵan jasóspirimge 5 aılyq eseptik kórsetkish – 15 585 teńge kóleminde aıyppul salynsa, jalpy 146 850 teńge kóleminde aıyppul ilindi», - dedi spıker.
