Tarazda 43 jastaǵy áıel azamattyq nekedegi kúıeýin óltirdi degen kúdikke ilindi
Oblystyq polıtsııa departamentiniń málimetinshe, 3 maýsym kúni saǵat 17.00 shamasynda Taraz qalasynyń 2-polıtsııa bólimine qalalyq №1 aýrýhanasynan habar túsken.
Onda 47 jastaǵy jergilikti turǵynnyń dene jaraqatymen túskeni aıtylǵan.
Er adam kelesi kúni jansaqtaý bóliminde esin jımastan qaıtys boldy.
«Atalǵan derek boıynsha júrgizilgen jedel izdestirý sharalarynyń nátıjesinde osy qylmysqa qatysy bar degen kúdikpen jábirlenýshiniń 43 jastaǵy azamattyq nekedegi áıeli anyqtalyp, ustaldy. Ol kinásin tolyq moıyndap, ýaqytsha ustaý ızolıatoryna qamaqqa alyndy», - deıdi polıtsııa departamentiniń baspasóz hatshysy Gúlsara Muhtarqulova.
Kúdikti buryn sotty bolmaǵan.
Qazirgi ýaqytta atalǵan derekke qatysty QR Qylmystyq kodeksiniń 99-baby 1-bóligimen sotqa deıingi tergeý amaldary júrip jatyr.