Tarazda 40 eldiń dızaınerleri qatysyp jatqan halyqaralyq sán aptalyǵy ótýde
TARAZ. QazAqparat – Jambyl oblysynda halyqaralyq ASPARA FASHION WEEK MERKE» dástúrli sán aptalyǵy ótýde, dep habarlaıdy QazAqparat tilshisi.
«Aspara fashion week» jobasy Merki aýdanynda ótýde. Bul shara álemniń 40 elinen sán kıim úlgilerin jasaıtyn 100 dızaınerlerdi jáne tanymal 30 sán blogerlerin sondaı-aq jýrnalıster, Eýropa men Azııa sán aptalyǵy basshylarynyń basyn qosyp otyr.
Bul – sán aptalyǵynyń altynshy maýsymy. Bıyl álemde qalyptasqan jaǵdaıǵa baılanysty onlaın formatta uıymdastyrylǵan sán aptalyǵyn sánsúıer qaýym qazannyń 10-yna deıin onlaın rejımde ZOOM jelisinde, Aspara Fashion Week, Youtube kanaly, Instagram, Facebook jáne Aspara Fashion Week paraqshalarynda tikeleı efırde tamashalaı alady.
Sharaǵa otandyq mamandarynan bólek, sheteldik dızaınerler kóptep tartylǵan. Olarǵa qazaqstandyq sán úlgisi men tyń týyndylar tikeleı efırde qashyqtan tanystyrylady. Sándi joba álem dızaınerleriniń qyzyǵýshylyǵyn týdyryp otyr.
Saltanatty sharany onlaın tamashalap, tikeleı baılanysqa shyqqan oblys ákimi Berdibek Saparbaev, sán merekesiniń ashylýymen quttyqtap, jyly lebizin bildirdi.
Aptalyqtyń alǵashqy kúni Qytaı men Ońtústik-Shyǵys Azııa elderi Sıngapýr, Indonezııa, Mıanma, Fılıppın, Taıland, Malaızııa, Brýneı, Laos, Kambodja, Vetnamnan kelgen 30 dızaıner óz kollektsııalaryn usyndy. Ekinshi kúni Qazaqstan men Qyrǵyzstan, Ózbekstan men Túrkimenstan jáne Tájikstandyq 22 dızaıner kıimderin kórsetse, úshinshi kúni kórermen Eýropa, Afrıka jáne Amerıka qurlyǵynan kelgen 20 dızaınerdiń kollektsııalaryn tamashalaıdy dep kútilýde. Olar Birikken Arab Ámirlikteri, Ulybrıtanııa, Italııa, Argentına, Vengrııa, Shvetsııa, AQSh, Kenııa, Marokko, Serbııa, Frantsııa, Ispanııa, Saha Respýblıkasy, Kıpr, Moldova, Gollandııa, Ýkraına jáne Efıopııa sán sheberleri. Jylyna bir keletin sán merekesiniń ashylýyna sheteldik dızaınerler de óz quttyqtaýlaryn onlaın jetkizdi. Sonyń biri efıopııalyq kıim dızaıneri Lýlıt Aýel. Ol óz sózinde qazaq sángerleriniń týyndylaryn joǵary baǵalaıtynyn atap ótti.
«Efıopııa da Qazaqstan sekildi kópultty el. Muny halyqtyń mádenıeti men kıimderinen anyq ańǵarýǵa bolady. Qazaq sángerleriniń jumysymen burynnan tanyspyn ári maǵan erekshe unaıdy. Men úshin bul sán aptalyǵy onlaın bolsa da jańa dúnıelerdi kórip, tanysýǵa jáne jańa ıdeıalardy júzege asyrýǵa úlken múmkindik bolaıyn dep tur», — deıdi ol.
Al, belgili otandyq dızaıner Aıdarhan Qalıev sharanyń maqsaty men mańyzyna toqtaldy.
«Bizdiń eń basty maqsatymyz – qazaqstandyq dızaınerlerdi álemdik naryqtarǵa, álemdik qaýymdastyqqa tanytý. Tikeleı efırde kórermender ońtústik shyǵys jáne Ortalyq Azııa, Eýropa, Amerıka jáne Afrıka dızaınerleriniń shyǵarmashylyq toptamalaryn tamashalap qana qoımaı, sonymen qatar Merkiniń tabıǵaty men mádenıetin ǵajaıyptarymen tanysa alady»,-deıdi A.Qalıev.
