Tarazda 280 kópqabatty turǵyn úıden turatyn jańa shaǵyn aýdan boı kóterýde

TARAZ. QazAqparat – Taraz qalasyndaǵy jańa 15-shaǵyn aýdanda bıyl 80 jáne 60 páterli 25 kópqabatty turǵyn úıdiń qurylysy júrgizilýde. Bul týraly ÓKQ alańynda qala basshysy Qaırat Dosaev aıtty, dep habarlaıdy QazAqparat.

«Qazirgi tańda Súleımenov kóshesiniń sońyndaǵy 362 gektarda 15-shi móltek aýdanynyń qurylysy júrgizilýde. Onda «Nurly jer» turǵyn úı qurylysy baǵdarlamasy aıasynda 10 300 otbasyna arnalǵan 280 kópqabatty turǵyn úı boı kótermek. Qazirgi tańda 25 úı salynýda. Alqaptyń baılanys, káriz, sý jáne gaz qubyrlary jelileriniń qurylystary aıaqtalyp, elektrmen qamtý, ishki kvartaldyq kólik jolynyń jáne jylý jelileriniń qurylysy iske asyrylýda. Búgingi tańda 80 páterli 10 turǵyn úı paıdalanýǵa berilgen»,- deıdi Qaırat Dosaev.

Sondaı-aq,jańa shaǵyn aýdan mańynan jeke turǵyn úıler qurylysyn júrgizý boıynsha 555 jer telimi bólingen. Bul jer telimderine jeke ınvestorlar nesıege beriletin biryńǵaı sáýlettik stıldegi kottedjdik úılerdiń qurylysyn júrgizbek. Onyń 255-i boıynsha 4 merdigermen kelisimshart jasalǵan.

Aıta keteıik, búginde qala boıynsha 16 054 adam turǵyn úı kezeginde tur.